చినజీయర్‌ స్వామిపై ఫిర్యాదు

నకిరేకల్‌ పోలీస్‌ స్టేషన్‌లో చినజీయర్‌పై ఫిర్యాదు అందజేస్తున్న చెరుకు లక్ష్మి, తదితరులు

నకిరేకల్‌, న్యూస్‌టుడే: మాంసాహారులపై చినజీయర్‌ స్వామి అభ్యంతరకరమైన వ్యాఖ్యలు చేశారని తెలంగాణ ఇంటి పార్టీ మహిళా విభాగం రాష్ట్ర అధ్యక్షురాలు చెరుకు లక్ష్మి ఆరోపించారు. ఆయనపై చట్టపరమైన చర్యలు తీసుకోవాలని కోరుతూ నకిరేకల్‌ పోలీస్‌ స్టేషన్‌లో శుక్రవారం ఫిర్యాదు అందజేశామని వివరించారు. మాంసాహారుల ఆహార సంస్కృతిని కించపరిచే విధంగా ఉన్న చినజీయర్‌ స్వామి వ్యాఖ్యల వీడియో ఇటీవల ఒక ఛానల్‌లో ప్రసారమైందని ఆమె వివరించారు. ఆయన వ్యాఖ్యలను తీవ్రంగా ఖండిస్తున్నామని చెప్పారు. ఈ ఫిర్యాదును పరిశీలిస్తున్నామని నకిరేకల్‌ సీఐ కె.నాగరాజు తెలిపారు.