దేవరకొండ, న్యూస్‌టుడే: దేవరకొండ పరిధిలోని జరిగే ఉపాధిహామీ పనులను గురువారం నేషనల్‌ లెవల్‌ మానిటరింగ్‌ అండ్‌ అవెల్యూషన్‌ సభ్యులు పరిశీలించారు. మండల పరిధిలోని తాటికోల్‌, కొండభీమనపల్లి, పెద్దతండాలో ఎన్‌ఎల్‌ఎం బృందం సభ్యులు గంగప్ప పనుల తీరును అక్కడున్న అధికారులను అడిగి తెలుసుకున్నారు. వైకుంఠధామం, చెత్తడంపింగ్‌లో వర్మికంపోస్టు తయారు చేసే విధాన వివరాలను అడిగి తెలుసుకున్నారు. పల్లె ప్రకృతి వనం, నర్సరీలో మొక్కలను పరిశీలించారు. కొండభీమనపల్లి గ్రామ పంచాయతీలో దస్త్రాలు పరిశీలించారు. గ్రామంలో ఉన్న క్రిమిటోరియం పరిశీలించి, దొండ పందిరి రైతులతో మాట్లాడారు. ఆయన వెంట ఏపీడీలు శైలజ, రవీందర్‌, ఎంపీడీవో శర్మ, ఎంపీవో నర్సింహారావు, ఏపీవో రాంచందర్‌ తదితరులున్నారు.

పెద్దఅడిశర్లపలి: పీఏపల్లి మండలం భీమనపల్లి, వద్దిపట్ల, అజ్మాపురంలలో ఉపాధి నిధులతో చేపట్టిన పనులను జాతీయ స్థాయి బృందం గురువారం పరిశీలించింది. బృందం పరిశీలకుడు గంగప్ప ఆధ్వర్యంలో ఆయా గ్రామాల్లో నిర్మించిన పల్లె ప్రకృతి వనాలు, వైకుంఠధామాలు, కంపోస్టుషెడ్లు, రైతువేదికలు, దొండ పందిర్లు, బత్తాయి తోటలను పరిశీలించి నిధుల వినియోగం గురించి ఆరా తీశారు. అనంతరం దస్త్రాలు పరిశీలించి నిర్వహణలో తీసుకోవాల్సిన జాగ్రత్తలు సూచించారు. కార్యక్రమంలో ఏపీడీ శైలజ, అసిస్టెంట్‌ పీడీ రవీందర్‌, ఎంపీడీవో మోహన్‌రెడ్డి, ఏపీవో శ్రీనివాస్‌, ఈసీ రాజు, సర్పంచులు, పాల్గొన్నారు.