విషాద ప్రయాణం

నకిరేకల్‌, న్యూస్‌టుడే: నకిరేకల్‌- తానంచర్ల 365 నంబర్‌ కొత్త జాతీయ రహదారిపై నకిరేకల్‌ శివారులో కారు బోల్తా పడిన ప్రమాదంలో మహిళ మృతి చెందారని పోలీసులు తెలిపారు. హైదరాబాద్‌ మల్కాజ్‌గిరిలో నివాసం ఉంటున్న పసుపులేటి సతీశ్‌ తన భార్య వరలక్ష్మి, కుమారుడు వికాస్‌తో కలిసి కారులో జంగారెడ్డిగూడెం వెళ్లి తిరుగు ప్రయాణంలో కొత్త జాతీయ రహదారి మీదుగా హైదరాబాద్‌ వెళ్తున్నారు. నకిరేకల్‌ వద్ద గురువారం రాత్రి కారు అదుపు తప్పిందని సీఐ కె.నాగరాజు శుక్రవారం తెలిపారు. కారు వెనుక టైరు పంక్చర్‌ కావడంతో రోడ్డు కిందగా నిమ్మ తోటలోకి దూసుకెళ్లి చెట్టుకు ఢీకొని బొల్తా పడిందన్నారు. ఈ ప్రమాదంలో పసుపులేటి వరలక్ష్మి(54) అక్కడికక్కడే మృతి చెందారని వివరించారు. కారులో ప్రయాణిస్తున్న మిగతా ఇద్దరు సీటు బెల్టు ధరించడం వల్లే సురక్షితంగా ఉన్నారని సీఐ వివరించారు. కేసు దర్యాప్తు చేస్తున్నామన్నారు.

ఏరు దాటుతూ ఇసుక గుంతలో కూరుకుపోయి..

పూలమ్మ

ఆత్మకూర్‌(ఎస్‌), న్యూస్‌టుడే: పొలం నాటుకు వెళ్తూ ఏరు దాటుతుండగా ఇసుక గుంతలో మునిగిపోయి మహిళ దుర్మరణం పాలైన ఘటన మక్తాకొత్తగూడెంలో శుక్రవారం చోటుచేసుకుంది. స్థానికులు తెలిపిన వివరాల ప్రకారం.. గ్రామానికి చెందిన వీరబోయిన పూలమ్మ (34)కు ఏటి అవతల ఖమ్మం జిల్లా కాకరావాయి గ్రామ పరిధిలో రెండెకరాల పొలం ఉంది. ఈ పొలంలో నాట్లు వేసేందుకు మక్తాకొత్తగూడెంలోని తన ఇంటి నుంచి బయల్దేరి ఏరుదాటాలి. గతంలో ఏటిలో ఇసుక కోసం ఇష్టారాజ్యంగా గుంతలు తవ్వారు. ఏటిలో ఉన్న నీళ్లలో గుంతలు ఎక్కడున్నాయో కనిపించే పరిస్థితి లేదు. పూలమ్మ శుక్రవారం ఉదయం నీళ్లలో నడుచుకుంటూ ఏరు దాటుతున్న క్రమంలో ఇసుక గుంతలోకి జారిపోయారు. ఈత రాకపోవడంతో ఊపిరాడక ఆమె అక్కడికక్కడే చనిపోయారు. ఏటిలో మునిగిపోతున్న పూలమ్మను కాపాడేందుకు సమీపంలో గీతకార్మికుడు హుటాహుటిన తాటిచెట్టు దిగి అక్కడికి వచ్చారు. అప్పటికే పూలమ్మ ప్రాణాలు వదిలారు. పూలమ్మకు భర్త సత్తయ్య, ఇద్దరు కుమారులున్నారు. ఈ ప్రమాదంపై తమకు ఫిర్యాదు అందలేదని ఎస్సై యాదవేందర్‌రెడ్డి తెలిపారు.

రైలు కింద పడి వ్యాపారి బలవన్మరణం

భువనగిరి నేరవిభాగం, న్యూస్‌టుడే: ఆర్థిక ఇబ్బందులతో మనస్తాపం చెంది రైలు కింద వ్యక్తి బలవన్మరణానికి పాల్పడిన ఘటన భువనగిరి పురపాలిక పరిధిలోని రాయగిరి సమీపంలో శుక్రవారం చోటుచేసుకుంది. రైల్వే పోలీసులు తెలిపిన వివరాల ప్రకారం.. రాయగిరికి చెందిన పచ్చిమట్ల వెంకటేష్‌(42) హోటల్‌తోపాటు ఇతర వ్యాపారాలు నిర్వహిస్తున్నారు. కొన్నేళ్ల క్రితం నూతన ఇల్లు నిర్మించారు. ఆర్థిక ఇబ్బందుల కారణంగా మనస్తాపంతో శుక్రవారం ఇంట్లో నుంచి వెళ్లి రాయగిరి చెరువు సమీపంలో గుర్తుతెలియని రైలు కిందపడి ఆత్మహత్య చేసుకున్నారు. రైల్వేపోలీసులు ఘటనా స్థలంలో పంచనామా నిర్వహించి మృతదేహాన్ని మరణోత్తర పరీక్షల నిమిత్తం జిల్లా కేంద్రాసుపత్రి శవాగారానికి తరలించారు. మృతుడికి భార్య, ఒక కుమార్తె, ఇద్దరు కుమారులు ఉన్నారు.

పైపులు జారిపడి డ్రైవర్‌ దుర్మరణం

చౌటుప్పల్‌గ్రామీణం, న్యూస్‌టుడే: చౌటుప్పల్‌ మండలం దండుమల్కాపురంలోని ఇండియన్‌ ఆయిల్‌ కార్పోరేషన్‌ టెర్మినల్‌(ఐవోసీఎల్‌)లో జరిగిన ప్రమాదంలో లారీ డ్రైవర్‌ మృతి చెందారు. ఇందుకు సంబంధించిన వివరాలను పోలీస్‌ ఇన్‌స్పెక్టర్‌ ఎన్‌.శ్రీనివాస్‌ శుక్రవారం తెలిపారు. ఐవోసీఎల్‌లో మిగిలిన ఇంధన ఇనుప పైపులను పశ్చిమ బెంగాల్‌ రాష్ట్రంలోని కోల్‌కత్తాకు తరలించేందుకు బీహార్‌ రాష్ట్రం సారన్‌ జిల్లా మోతాహా ప్రాంతానికి చెందిన లారీ డ్రైవర్‌ అజయ్‌కుమార్‌ సింగ్‌(51) గురువారం మధ్యాహ్నాం ఇక్కడికి వచ్చారు. క్రేన్‌ సాయంతో పైపులను లారీలో అమర్చారు. పైపులను అమర్చిన తర్వాత లారీ సిల్‌ సరిగ్గా ఉందా పరిశీలిస్తున్నారు. ఈ క్రమంలో ప్రమాదవశాత్తు పైపులు జారీ అజయ్‌కుమార్‌ సింగ్‌పై పడడంతో తీవ్రంగా గాయపడ్డారు. క్షతగాత్రుడిని హైదరాబాద్‌లోని ఓ ప్రైవేట్‌ ఆసుపత్రికి తరలించారు. అక్కడ చికిత్స పొందుతూ గురువారం అర్ధరాత్రి మృతి చెందాడు. మృతుని బంధువు అక్షయ్‌కుమార్‌ సింగ్‌ ఫిర్యాదు మేరకు ఎస్సై సైదులు కేసు నమోదు చేసి దర్యాప్తు చేస్తున్నట్లు చెప్పారు.

అనుమానాస్పద స్థితిలో యువకుడు..

నల్గొండ నేరవిభాగం, న్యూస్‌టుడే: ముషంపల్లి గ్రామానికి చెందిన బండా అమృతరెడ్డి(42) మిర్యాలగూడలో ప్రైవేటు ఫొటోగ్రాఫర్‌గా పని చేస్తున్నారు. ముషంపల్లిలోని తన వ్యవసాయ భూమి వద్దకు గురువారం వచ్చినట్లు రూరల్‌ పోలీసులు తెలిపారు. తోటలో ఉన్న గది వద్ద కాలు జారి కిందపడడంతో తలకు బలమైన గాయాలై చనిపోయినట్లు కుటుంబ సభ్యులు చెబుతున్నారు. తన భర్త మృతికి పలు అనుమానాలున్నాయని అమృతరెడ్డి భార్య మంజుల ఫిర్యాదుతో మృతదేహానికి పోస్టుమార్టం నిర్వహించి కుటుంబ సభ్యులకు అప్పగించి కేసు దర్యాప్తు చేస్తున్నట్లు ఎస్సై గోపాల్‌రావు తెలిపారు.