జ్వర బాధితుల సర్వే ప్రారంభం

నల్గొండలో ఇంటింటి సర్వే నిర్వహిస్తున్న వైద్య ఆరోగ్యశాఖ సిబ్బంది

నల్గొండ అర్బన్‌, న్యూస్‌టుడే: జిల్లాలో జ్వర బాధితుల వివరాలు సేకరించేందుకు శుక్రవారం వైద్య ఆరోగ్యశాఖతోపాటు సమన్వయ శాఖల అధికారులు సిబ్బంది పాల్గొన్నారు. మొదటి రోజు జిల్లాలో 1,366 బృందాలు 58,440 ఇళ్లను సర్వే చేశారు. దీని ద్వారా 2.18 లక్షల మందిని సంప్రదించిన సిబ్బంది 2,041 మందికి జ్వరం, జలుబు, ఒళ్లునొప్పులు, ఇతర సమస్యలు ఉన్నట్లు గుర్తించి ప్రభుత్వం నుంచి వచ్చిన కిట్లను పంపిణీ చేశారు. జిల్లా కేంద్రంలో నిర్వహించిన ఇంటింటా జ్వర సర్వేలో వైద్యఆరోగ్యశాఖ అధికారి అన్నిమల్ల కొండల్‌రావు పాల్గొని మాట్లాడారు. జిల్లాలో ప్రతి ఇంటికి వైద్య సిబ్బంది వెళ్లి జ్వర సర్వే నిర్వహించన్నుట్లు తెలిపారు. అనుమానం ఉన్న ప్రతి ఒక్కరూ కొవిడ్‌ పరీక్షలు చేయించుకోవాలని సూచించారు. శుక్రవారం జిల్లాలో 4,662 మందికి కొవిడ్‌ పరీక్షలు చేయగా 426 మందికి పాజిటివ్‌ వచ్చినట్లు తెలిపారు. కార్యక్రమంలో అడిషన్‌ డీఎంహెచ్‌వో వేణుగోపాల్‌రెడ్డి, డా. హరికృష్ణ పాల్గొన్నారు.