అక్రమ కట్టడాలను కూల్చేయండి: మంత్రి

సూర్యాపేట: మానసనగర్‌లో నాలాను పరిశీలించి అధికారులకు సూచనలిస్తున్న మంత్రి జగదీశ్‌రెడ్డి,
చిత్రంలో డీసీఎంఎస్‌ ఛైర్మన్‌ వట్టె జానయ్యయాదవ్‌, తదితరులు

సూర్యాపేట పురపాలిక: సూర్యాపేట పట్టణంలో నాలాలను ఆక్రమించి నిర్మించిన కట్టడాలను వెంటనే కూల్చేయాలని విద్యుత్తు శాఖ మంత్రి గుంటకండ్ల జగదీశ్‌రెడ్డి మున్సిపల్‌ అధికారులను ఆదేశించారు. ఇటీవల కురిసిన వర్షాలకు కాలనీలు జలమయం కావడంతో పలువురు మంత్రి దృష్టికి తీసుకెళ్లగా మానసనగర్‌లో అధికారులతో కలిసి నాలా ఆక్రమణ ప్రాంతాన్ని జగదీశ్‌రెడ్డి శుక్రవారం సందర్శించారు. నాలా వెడల్పు ఎంత ఉండాలి అనే దానిపై అధికారులతో చర్చించి హద్దును ఏర్పాటు చేయాలని ఆదేశించారు. మరోసారి కాలనీని సందర్శించి అభివృద్ధి పనులు ప్రారంభిస్తామని చెప్పారు. కార్యక్రమంలో డీసీఎంఎస్‌ ఛైర్మన్‌ వట్టె జానయ్యయాదవ్‌, పుర కమిషనర్‌ పి.రామాంజులరెడ్డి పాల్గొన్నారు.