పేర్లు రాసి.. డబ్బులు కాజేసి..!

నిఘా విభాగం, న్యూస్‌టుడే: సెంటుభూమి లేని, కౌలు రైతులు కానివారి పేరిట వందలకొద్దీ ధాన్యం బస్తాలు ఐకేపీ కొనుగోలు కేంద్రాల్లో అమ్మినట్లు మిల్లర్లు సృష్టించి డబ్బులు దండుకుంటున్నారనే ఆరోపణలు వినిపిస్తున్నాయి. ఐకేపీ నిర్వాహకులు, మిల్లర్లు, అధికారులు కుమ్మక్కై రూ.కోట్ల ప్రజాధనాన్ని కొల్లగొడుతున్నారనే వాదనలు వ్యక్తమవుతున్నాయి. ఓ ప్రజాప్రతినిధికి మిల్లులు ఉండడం, అతని అనుచరుల పేరిట వందల బస్తాలు అమ్మినట్లు ఆరోపణలు వచ్చినా ఉన్నతాధికారులు చూసీచూడనట్లు వ్యవహరిస్తున్నారని పలువురు ఆరోపిస్తున్నారు.

మిల్లర్లు, అధికారులు, నిర్వాహకులు కుమ్మక్కై..

గడ్డిపల్లిలోని మిల్లర్లు పెన్‌పహాడ్‌ మండలంలోని ఓ గ్రామం ఐకేపీ నిర్వాహకులు, అధికారులతో కుమ్మక్కైయ్యారు. ఓ ప్రజాప్రతినిధి డ్రైవర్‌ పేరిట 898 బస్తాలు, గ్రామ సిబ్బంది ఒకరి పేరిట 506 బస్తాలు, భూమి లేని మహిళ- 449 బస్తాలు, కులవృత్తి చేసుకునే దంపతులు- 924 బస్తాలు, లారీ డ్రైవర్‌- 428 బస్తాలు, వాచర్‌- 450, వడ్రంగి- 420 బస్తాలు, 108 వాహన టెక్నీషియన్‌ పేరిట 467 బస్తాలు అమ్మినట్లు ఐకేపీ కొనుగోలు కేంద్రంలో దస్త్రాలు సృష్టించారు. సదరు కొనుగోలు కేంద్రం ఉన్న గ్రామంలో ఓ కుటుంబంలో ముగ్గురి పేరిట సుమారు 1,000 ధాన్యం బస్తాలు కొన్నట్లు రాశారు. ధాన్యం కొనకున్నా మరో 15 మంది పేరిట వందల బస్తాలు రాసి డబ్బులు దండుకున్నట్లు సమాచారం.