వైద్యరంగానికి అధిక ప్రాధాన్యం: మంత్రి

ప్రభుత్వ ఆసుపత్రిలో సిబ్బందితో సమీక్ష జరుపుతున్న మంత్రి జగదీశ్‌రెడ్డి, చిత్రంలో కలెక్టర్‌ వినయ్‌ కృష్ణారెడ్డి, వైద్యులు

తాళ్లగడ్డ(సూర్యాపేట), న్యూస్‌టుడే: వైద్యరంగానికి ప్రభుత్వం అధిక ప్రాధాన్యం ఇస్తోందని మంత్రి గుంటకండ్ల జగదీశ్‌రెడ్డి అన్నారు. సూర్యాపేటలోని జనరల్‌ ఆసుపత్రిలో నూతన డైట్‌ పాలసీని కలెక్టర్‌ వినయ్‌ కృష్ణారెడ్డితో కలిసి శనివారం ప్రారంభించారు. ఈ సందర్భంగా మాట్లాడుతూ రాష్ట్రంలోని అన్ని ఆసుపత్రుల్లో అధునాతన పరికరాలు అందించామని, వైద్యులు ప్రజలకు మెరుగైన వైద్యసేవలందించాలన్నారు. జిల్లాలో ఆరోగ్యశ్రీ కేసులు ఎక్కువగా పెంచాలని, ఆసుపత్రికొచ్చే వ్యాధిగ్రస్థులతో సానుకూలతతో వైద్యసిబ్బంది మెలగాలని సూచించారు. వివిధ విభాగాల ద్వారా అందిస్తున్న సేవలను కలెక్టర్‌తో కలిసి మంత్రి సమీక్షించారు. అనంతరం టి.హబ్‌, వెయ్యి పడకల ఆసుపత్రి నిర్మాణాల కోసం స్థల పరిశీలన చేశారు. ఆసుపత్రి పర్యవేక్షకులు డాక్టర్‌ మురళీధర్‌రెడ్డి, వైద్యకళాశాల ప్రిన్సిపాల్‌ శారద, వివిధ విభాగాల వైద్యులు, ప్రజాప్రతినిధులు, సిబ్బంది, తదితరులు పాల్గొన్నారు.