దారి దోపిడీ

నకరికల్లు, సత్తెనపల్లి, న్యూస్‌టుడే: పల్నాడు జిల్లాలో రెండు దారి దోపిడీ ఘటనలు కలకలం రేపాయి. బాధితులు, పోలీసుల వివరాల మేరకు.. సూర్యాపేట జిల్లా మేళ్లచెరువులోని సిమెంట్‌ కంపెనీలో మిల్లర్‌గా పని చేస్తున్న గొల్ల రామకృష్ణ, భారతి దంపతులు నంద్యాల జిల్లా వెలిగోడు మండలం రేగడిగూడురులో పెళ్లికి హాజరయ్యారు. అక్కడి నుంచి రైలులో వచ్చి నరసరావుపేట రైల్వేస్టేషన్‌లో సోమవారం తెల్లవారుజామున దిగారు. ద్విచక్రవాహనంపై స్వగ్రామానికి బయల్దేరారు. నకరికల్లు మండలం శాంతినగర్‌ సమీపంలోకి రాగానే రెండు బైకులపై ఉన్న ఆరుగురు యువకులు వెంబడించి దంపతులతో అకారణంగా వాగ్వాదానికి దిగారు. రాయితో భారతి తలపై మోదారు. ఆమె మెడలోని 35 గ్రాముల బంగారు నానుతాడు, రామకృష్ణ వద్ద సెల్‌ఫోన్‌ కాజేసి పరారయ్యారు. బాధితులను నరసరావుపేట ఏరియా వైద్యశాలకు తరలించినట్లు నకరికల్లు పోలీసులు వెల్లడించారు. ఈ ఘటనకు ముందు తిరుమల వెళ్లి మధ్యరాత్రి సత్తెనపల్లి రైల్వేస్టేషన్‌లో దిగి నడుచుకుంటూ వస్తున్న వారి నుంచి ఆరుగురు యువకులు రూ.5 వేల నగదు, చేతి గడియారం తీసుకెళ్లారు. ఈ మేరకు బాధితులు పోలీసులను ఆశ్రయించగా నిందితుల కోసం గాలింపు చేపట్టారు.