లోక్‌ అదాలత్‌లను సద్వినియోగం చేసుకోవాలి

న్యాయమూర్తి గౌతంప్రసాద్‌

సూర్యాపేట న్యాయవిభాగం, న్యూస్‌టుడే: సూర్యాపేట జిల్లావ్యాప్తంగా ఆదివారం జరగనున్న జాతీయ లోక్‌ అదాలత్‌లను కక్షిదారులు సద్వినియోగం చేసుకోవాలని సూర్యాపేట జిల్లా ప్రధాన న్యాయమూర్తి బి.గౌతంప్రసాద్‌ పిలుపునిచ్చారు. జిల్లా వ్యాప్తంగా ఉన్న అన్ని కోర్టుల్లో ఆదివారం లోక్‌ అదాలత్‌లు నిర్వహిస్తున్న విషయం విదితమే. న్యాయమూర్తి శనివారం మాట్లాడుతూ వివాదాల సత్వర, శాశ్వత పరిష్కారానికి లోక్‌ అదాలత్‌లే సరైన వేదికలన్నారు. కక్షిదారులు తమ కేసులను లోక్‌ అదాలత్‌లలో పరిష్కరించుకోవడం ద్వారా సమయం, ధనాన్ని ఆదా చేసుకోవచ్చన్నారు. లోక్‌ అదాలత్‌లలో కేసులు పరిష్కరించుకున్నట్లయితే ఇప్పటికే చెల్లించిన కోర్టు ఫీజులు తిరిగి చెల్లించడం జరుగుతుందన్నారు. లోక్‌ అదాలత్‌ల ద్వారా జారీ చేసే అవార్డులు అప్పీలు లేని అంతిమ తీర్పులని న్యాయమూర్తి తెలిపారు. ఈ లోక్‌ అదాలత్‌లలో మోటారు వాహన ప్రమాదాల క్లయిములు, భూ పరిహారం కేసులు, భూవివాదాలతోపాటు రాజీపడ దగ్గ అన్ని క్రిమినల్‌ కేసులు పరిష్కరించుకోవచ్చని తెలిపారు. జాతీయ మరియు రాష్ట్ర న్యాయసేవాధికార సంస్థల ఆదేశాలతో ఈ లోక్‌ అదాలత్‌లను నిర్వహిస్తున్నట్లు తెలిపిన న్యాయమూర్తి కక్షిదారులు ఈ అవకాశాన్ని సద్వినియోగం చేసుకోవాలని కోరారు.