పెళ్లికి నిరాకరించిందని యువకుడి బలవన్మరణం

కోనేటి మహేష్‌

జాజిరెడ్డిగూడెం, న్యూస్‌టుడే: ప్రేయసి పెళ్లికి నిరాకరించిందని యువకుడు బలవన్మరణానికి పాల్పడిన ఘటన మండలంలోని కొమ్మాల గ్రామంలో చోటుచేసుకుంది. పోలీసులు తెలిపిన వివరాల ప్రకారం.. సూర్యాపేట మండలం పిల్లలమర్రి గ్రామానికి చెందిన తాపీ మేస్త్రీ కోనేటి మహేష్‌(23) నాలుగేళ్ల క్రితం ఒక యువతితో ఏర్పడిన పరిచయం ప్రేమగా మారింది రోజూ ఎక్కువ సమయం ఫోన్‌లో ఇద్దరు మాట్లాడుకునేవారు. వారం క్రితం ఆమె పెళ్లికి నిరాకరించడంతో ఇద్దరి మధ్య మనస్పర్థలు ఏర్పడ్డాయి. ఆ యువతి వద్దకు వెళ్లాడు. తను మాట్లాడక పోవడంతో అప్పటికే తన వెంట తెచ్చుకున్న గడ్డి మందును తాగాడు. స్థానికులు సూర్యాపేట ప్రభుత్వ ఆసుపత్రికి తరలించగా.. చికిత్స పొందుతూ శనివారం మృతి చెందారు. మృతుని తండ్రి కోనేటి రాములు ఫిర్యాదు మేరకు కేసు నమోదు చేసుకుని దర్యాప్తు జరుపుతున్నట్లు అర్వపల్లి ఎస్సై అంజిరెడ్డి తెలిపారు.