మృత్తికను సంరక్షించుకుంటేనే మనుగడ: కలెక్టర్‌

భువనగిరిలో చేపట్టిన అవగాహన ర్యాలీని జెండా ఊపి ప్రారంభిస్తున్న కలెక్టర్‌ పమేలా సత్పతి

భువనగిరి, న్యూస్‌టుడే: జీవకోటికి ఆధారమైన భూమిని పరిరక్షించుకునేందుకు ప్రతి ఒక్కరూ కంకణబద్ధులు కావాలని కలెక్టర్‌ పమేలా సత్పతి అన్నారు. ప్రపంచ మృత్తికా దినోత్సవం (వరల్డ్‌ సాయిల్‌ డే) పురస్కరించుకుని స్థానిక ప్రభుత్వ జూనియర్‌ కళాశాల ఆవరణ నుంచి చేపట్టిన ర్యాలీని సోమవారం కలెక్టర్‌ జెండా ఊపి ప్రారంభించారు. ఈ సందర్భంగా మాట్లాడుతూ.. ప్రకృతి ప్రసాదించిన సహజవనరులను కాపాడుకుంటేనే భావితరాలకు మనుగడ ఉంటుందన్నారు. అధిక దిగుబడిపై ఆశతో మితిమీరిన క్రిమిసంహారక మందులు, ఎరువుల వినియోగం వల్ల భూమి సారం కోల్పోతుందని ఆందోళన వ్యక్తం చేశారు. పరిశ్రమల నుంచి వెలువడే వ్యర్థ రసాయనాలతో భూకాలుష్యం ఏర్పడి మానవాళి మనుగడకు సవాల్‌ విసురుతోందన్నారు. ఎరువుల వాడకం, జలాల సంరక్షణ, పర్యావరణ పరిరక్షణపై ప్రతి ఒక్కరికి అవగాహన కల్పించాలన్నారు. జిల్లా విద్యాశాఖ అధికారి నారాయణరెడ్డి, జిల్లా ఇంటర్మీడియట్‌ అధికారి రమణి, మున్సిపల్‌ కమిషనర్‌ నాగిరెడ్డి, మండల విద్యాశాఖ అధికారులు లక్ష్మీనారాయణ, నాగవర్ధన్‌రెడ్డి, న్యూడైమన్షన్‌ పాఠశాల ప్రతినిధి సుభాష్‌రెడ్డి పాల్గొన్నారు. కలెక్టర్‌ ర్యాలీలో కొంతదూరం నడిచారు. ప్రభుత్వ జూనియర్‌ కళాశాల ఆవరణ నుంచి ప్రిన్స్‌ చౌరస్తా మీదుగా భువనగిరి ఖిల్లా వరకు ర్యాలీ కొనసాగింది.