నేడు యాదాద్రి కొత్త బస్‌ స్టేషన్‌ ప్రారంభం

ప్రారంభానికి సిద్ధమైన యాదాద్రి నూతన బస్‌స్టేషన్‌

యాదగిరిగుట్ట పట్టణం, న్యూస్‌టుడే: యాదాద్రి శ్రీ లక్ష్మీ నరసింహ స్వామి దేవస్థానం అభివృద్ధిలో భాగంగా కొండ దిగువన లక్ష్మీ పుష్కరిణి పక్కన చేపట్టిన నూతన ప్రయాణ ప్రాంగణం బుధవారం ప్రారంభం కానుంది. రూ.6.50 కోట్లతో ఈ బస్‌ స్టేషన్‌ను నిర్మాణం చేశారు. 8,600 చ.అ. విస్తీర్ణంలో నిర్మితమైన ఈ బస్‌ స్టేషన్‌లో 10 ప్లాట్‌ఫాంలు, ఆరు దుకాణ గదులు, హోటల్‌ కోసం ఒక గది, క్లాక్‌రూం, కార్గో కోసం ఒక గది, స్రీ, పురుషులకు వేర్వేరుగా శౌచాలయాలు ఉన్నాయి. మంచి నీటి సౌకర్యాలు ఏర్పాటు చేశారు. అంతా సిద్ధమైన ఈ బస్‌ స్టేషన్‌ను బుధవారం ప్రారంభించడానికి రాష్ట్ర రవాణా శాఖ మంత్రి పువ్వాడ అజయ్‌కుమార్‌, విద్యుత్‌ శాఖ మంత్రి జగదీశ్‌రెడ్డితో పాటు ఆర్టీసీ ఛైర్మన్‌ బాజిరెడ్డి గోవర్ధన్‌, ఎండీ సజ్జనార్‌, రైబస రాష్ట్ర అధ్యక్షులు పల్లా రాజేశ్వర్‌రెడ్డి, ఆలేరు ఎమ్మెల్యే గొంగిడి సునీత, ఎంపీలు కోమటిరెడ్డి వెంకట్‌రెడ్డి, బడుగుల లింగయ్య యాదవ్‌, జడ్పీ ఛైర్మన్‌ సందీప్‌రెడ్డి, కలెక్టర్‌ పమేలా సత్పతి తదితరులు రానున్నట్లుగా డీఎం శ్రీనివాస్‌ తెలిపారు.