ఒక్కరోజు.. ఊరంతా ఖాళీ

చందుపట్ల గ్రామ ప్రధాన వీధి నిర్మానుష్యంగా ఇలా..

నకిరేకల్‌, న్యూస్‌టుడే: చందుపట్ల గ్రామాన్ని బుధవారం గ్రామస్థులందరు మూకుమ్మడిగా ఖాళీ చేశారు. వ్యవసాయ బావులు, భూములు, శివారు ప్రాంతాలకు తరలివెళ్లారు.  చెట్లకిందే వంటావార్పు చేశారు. సాయంత్రం గ్రామం బాట పట్టారు. ఉదయం తెల్లవారుతుండగానే..ఇళ్ల ముందు కళ్లాపి కూడా చల్లకుండా గ్రామాన్ని విడిచారు.గ్రామంలో వరుస మరణాలు జరుగుతుండటమే ఇందుకు కారణం. గ్రామంలోని రెండు ప్రభుత్వ ప్రాథమిక, ఒక ఉన్నత పాఠశాల కూడా మూతపడటం గమనార్హం. కంటి వెలుగు శిబిరాన్ని మాత్రం కొనసాగించారు. 11 మంది మాత్రమే కంటి పరీక్షలకు వచ్చారు. గ్రామం మొత్తం ఖాళీ కావడంతో గ్రామంలో చోరీలు, ఇతర అవాంఛనీయ ఘటనలు జరగకుండా ఇద్దరు కానిస్టేబుళ్లు గ్రామ పంచాయతీ కార్యాలయం వద్ద బందోబస్తు నిర్వహించడం గమనార్హం.