క్యూ నెట్‌ బాధితులకు ప్రభుత్వం అండగా ఉంటుంది: మంత్రి తలసాని

క్యూనెట్‌ బాధితులతో మాట్లాడుతున్న మంత్రి తలసాని శ్రీనివాస్‌

రెజిమెంటల్‌బజార్‌, న్యూస్‌టుడే: క్యూనెట్‌ బాధితులకు ప్రభుత్వం అండగా ఉంటుందని మంత్రి తలసాని శ్రీనివాస్‌ యాదవ్‌ భరోసా ఇచ్చారు. సోమవారం సికింద్రాబాద్‌ వెస్ట్‌మారేడ్‌పల్లిలోని మంత్రి నివాసంలో ఆయన్ను క్యూనెట్‌ బాధితులు కలిసి గోడు వెళ్లబోసుకున్నారు. ఇటీవల అగ్నిప్రమాదం జరిగిన సికింద్రాబాద్‌లోని స్వప్నలోక్‌ కాంప్లెక్స్‌లో క్యూనెట్‌ సంస్థ కొనసాగుతోందని వారు మంత్రి దృష్టికి తెచ్చారు. ఉద్యోగావకాశాల పేరిట వరంగల్‌, ఖమ్మం, నల్గొండ, కరీంనగర్‌ జిల్లాలకు చెందిన 60 మంది వద్ద.. రూ. లక్షన్నర నుంచి రూ.3 లక్షల చొప్పున వసూలుచేసిందని వివరించారు.  స్పందించిన మంత్రి.. క్యూనెట్‌ నిర్వాహకులపై చర్యలు తీసుకోవడంతోపాటు బాధితులు చెల్లించిన సొమ్ములను తిరిగి ఇప్పించేలా చూస్తామని హామీ ఇచ్చారు. సంబంధిత సంస్థ నిర్వహకులపై వెంటనే కేసు నమోదు చేయాలని మహంకాళి ఠాణా పోలీసులను ఆదేశించారు.