వాహనం ఢీకొని బాలుడి మృతి

అడవిదేవులపల్లి, న్యూస్‌టుడే:  అడవిదేవులపల్లి మండలం గోన్యాతండాలో వాహనం ఢీకొని బాలుడు మృతి చెందిన సంఘటన  గురువారం రాత్రి చోటుచేసుకుంది. పోలీసులు తెలిపిన వివరాల ప్రకారం... గోన్యాతండాలో రాత్రి ఇంటిముందు ఆడుకుంటున్న బాలుడు పాతులోతు ప్రేమ్‌కుమార్‌(3)ని  టాటాఏస్‌ వాహనం అతివేగంతో ఢీకొట్టింది. గమనించిన  డ్రైవర్‌ వాహనాన్ని అక్కడే వదిలి పారిపోయాడు. డ్రైవర్‌ నిర్లక్ష్యం, అతి వేగంతో నడపడం వల్లే ప్రమాదం జరిగినట్లు పోలీసులు గుర్తించారు. ఈ ఘటనలో బాలుడికి తీవ్ర గాయాలుకాగా కుటుంబ సభ్యులు  మిర్యాలగూడ ఏరియా ఆసుపత్రికి తరలించగా మృతిచెందినట్లు తెలిపారు.  వాహనాన్ని ఠాణాకు తరలించినట్లు, బాలుడి తండ్రి బాల ఫిర్యాదు మేరకు కేసు నమోదుచేసుకుని దర్యాప్తు చేస్తున్నట్లు ఎస్సై హరిబాబు తెలిపారు.