దైవ దర్శనానికి అదనపు వరసలు

బ్రహ్మోత్సవ మండపం వద్ద గ్రిల్స్‌

యాదగిరిగుట్ట: యాదాద్రి పుణ్యక్షేత్రంలో భక్తులకు దైవ దర్శనం సులభంగా, త్వరితగతిన చేకూరేందుకు అదనపు వరసలు ఏర్పాటవుతున్నాయి. క్షేత్రాభివృద్ధిలో పునర్నిర్మితమైన పంచనారసింహుల మహా దివ్య ఆలయ సందర్శనకు భక్తుల రాక పెరుగుతోంది. దీంతో దైవ దర్శనం కోసం భక్తులు గంటల కొద్ది వేచి ఉండాల్సి వస్తోంది. మున్ముందు భక్తుల రాక మరింతగా పెరిగే అవకాశాలు ఉన్నాయని, ఆలయ నిర్వాహకులు అదనంగా వరసల ఏర్పాట్లపై దృష్టిసారించారు. పసిడి వర్ణం కాంప్లెక్స్‌లో మధ్యన స్టీల్‌ గ్రిల్స్‌తో మరో వరసను ఏర్పాటు చేస్తున్నారు. ఆలయ తూర్పు వైపున గల బ్రహ్మోత్సవ మండపం పరిసరాల్లోనూ అదనంగా స్టీల్‌ గ్రిల్స్‌తో పనులు ముమ్మరం చేశారు. ఈ ఏర్పాట్లతో దైవదర్శనం కోసం వేచి ఉండే భక్తులను వరస క్రమంలో ప్రధానాలయంలో ప్రవేశింపజేసేందుకు వీలు కలుగుతుందని దేవస్థానం సివిల్‌ విభాగం డిప్యూటీ ఈఈ మహిపాల్‌రెడ్డి తెలిపారు. తూర్పు ముఖంగా ఆలయం ఎదుటే కాకుండా, అదనపు వరసలు గర్భాలయం వరకూ ఏర్పాటవుతున్నాయన్నారు.