తెలంగాణ సాయుధ పోరాట యోధుడు సైరెడ్డి చెన్నారెడ్డి కన్నుమూత

నాగారం, భువనగిరి నేరవిభాగం, న్యూస్‌టుడే: సూర్యాపేట జిల్లా నాగారం మండలం వర్ధమానుకోట గ్రామానికి చెందిన తెలంగాణ సాయుధ పోరాట యోధుడు, సీపీఐ సీనియర్‌ నేత సైరెడ్డి చెన్నారెడ్డి (95) మంగళవారం రాత్రి హైదరాబాద్‌లో అనారోగ్యంతో కన్నుమూశారు. ఈయన ఉమ్మడి నల్గొండ జిల్లా కమ్యూనిస్టు నేతగా ఉంటూ తెలంగాణ సాయుధ పోరాటంలో నిజాం సర్కార్‌కు వ్యతిరేకంగా భీమిరెడ్డి నర్సింహారెడ్డి(బీఎన్‌రెడ్డి)తో కలిసి ఉద్యమించారు. ఈయనకు నలుగురు కుమార్తెలు, కుమారుడు ఉన్నారు. కుమారుడు సైరెడ్డి వెంకట్‌రెడ్డి భువనగిరి ఏసీపీగా పనిచేస్తున్నారు. హైదరాబాద్‌లోని వనస్థలిపురంలో బుధవారం అంత్యక్రియలు నిర్వహించనున్నట్లు ఏసీపీ తెలిపారు. చెన్నారెడ్డి మృతికి యాదాద్రి భువనగిరి జోన్‌ డీసీపీ రాజేశ్‌చంద్ర, తిరుమలగిరి మార్కెట్‌ కమిటీ వైస్‌ ఛైర్మన్‌ యారాల రాంరెడ్డి, పలువురు ప్రముఖులు సంతాపం వ్యక్తం చేశారు.