వీరుల బలిదానం.. వీర్ల చెరువు

ఆత్మకూరు(ఎం) మండల కేంద్రంలోని చెరువుకు చారిత్రక నేపథ్యంతో వీర్ల చెరువు అని పేరు. 1870 ప్రాంతంలో స్థానిక జాగీర్‌దార్‌ యాఖూబ్‌ అలీ ఆత్మకూరులో చెరువు నిర్మించేందుకు నిర్ణయించారు. నల్గొండ సమీపంలోని పానగల్‌ నుంచి సుమారు 70 మంది కూలీలను రప్పించాడు. 125 ఎకరాల్లో చెరువును తవ్వినందుకు కూలీగా రెండు తూముల (సుమారు 40 కిలోల కొల పాత్ర) నాణేలు ఇస్తాననడంతో కూలీలు సంతోషంగా ఒప్పుకున్నారు. నిర్మాణం పూర్తయిన తర్వాత ఒప్పందం ప్రకారం రెండు తూముల నాణేలు ఇవ్వమని కూలీలు అడిగారు. జాగీర్‌దారు మాత్రం తూముకు బదులు గొడ్డలి తూము (గొడ్డలికి ఉండే రంధ్రం)తో కొలిచి నాణేలను ఇచ్చాడు. కూలీలు జాగీరును బతిమిలాడినా కనికరం చూపలేదు. జాగీరును ఎదురించలేక, స్వగ్రామం పానగల్‌కు వెళ్లలేక చెరువును తొవ్విన గడ్డపారలతోనే పొడుచుకుని ఆత్మబలిదానాలు చేసుకున్నారు. చివరికి ఒక కూలీ ప్రాణాలతో మిగిలాడు. తమకు జరిగిన అన్యాయాన్ని ప్రపంచానికి తెలిపేందుకు చెరువు మత్తడి వద్ద బండలపై ఆత్మహత్య దృశ్యాలను చెక్కి జాగీర్‌దారును శపించి తాను బలవన్మరణం చెందాడు. వీరుల బలిదానంతో ఆత్మకూరు చెరువుకు వీర్ల చెరువుగా పేరువచ్చింది.

ఆత్మకూరు(ఎం) వీర్ల చెరువు