‘వైకాపా ప్రభుత్వం తీరు దుర్మార్గం’

పార్టీ శ్రేణులతో అబ్దుల్‌ అజీజ్‌ తదితరులు

నెల్లూరు గ్రామీణం, న్యూస్‌టుడే : వైకాపా ప్రభుత్వం దుర్మార్గంగా వ్యవహరిస్తోందని, జగన్‌మోహన్‌రెడ్డి ముఖ్యమంత్రి అయినప్పటి నుంచి రాష్ట్రానికి ఖర్మ పట్టిందని నెల్లూరు పార్లమెంటు నియోజకవర్గ తెదేపా అధ్యక్షుడు అబ్దుల్‌ అజీజ్‌ విమర్శించారు. తెదేపా చేపట్టిన ఇదేం ఖర్మ మన రాష్ట్రానికి కార్యక్రమాన్ని ఆయన నెల్లూరు గ్రామీణ మండలం సౌత్‌మోపూర్‌లో శుక్రవారం సాయంత్రం ప్రారంభించి మాట్లాడారు. రాష్ట్రంలో ఆడబిడ్డలకు రక్షణ లేకుండా పోయిందని, ముఖ్యంగా నెల్లూరు గ్రామీణంలో పరిస్థితి మరింత దారుణంగా తయారైందన్నారు. నగరంలోని ఒక స్కూల్లో ఆడబిడ్డపై అరాచకం జరిగిందని వారి తల్లిదండ్రులు ఆవేదన వ్యక్తం చేస్తున్నారని తెలిపారు. పోలీసు వ్యవస్థ నిర్వీర్యమైందని, అన్యాయం జరిగిందని చెప్పే బాధితులపైనే కేసులు పెడుతున్నారని ఆరోపించారు. వైకాపా నాయకులతో ఏ సమస్య వచ్చినా తమ దృష్టికి తీసుకురావాలని, బాధితులకు పార్టీ అండగా ఉంటుందని తెలిపారు. కార్యక్రమంలో పార్టీ నాయకులు జన్ని రమణయ్య, భాస్కర్‌రెడ్డి, పముజుల ప్రదీప్‌, జలదంకి సుధాకర్‌ తదితరులు పాల్గొన్నారు. పార్టీలో చేరిన వారికి తెదేపా కండువాలు కప్పి ఆహ్వానించారు.