56 ఏళ్లుగా ఎన్టీఆర్‌పై మమకారం

శ్రీనివాసులు ఇంట్లో ఎన్టీఆర్‌ చిత్రపటాలు

న్యూస్‌టుడే, సీతారామపురం: దేవుడంటే ఎన్టీఆర్‌ అనేలా తన మనసులో ముద్రించుకున్నారాయన. అప్పటి నుంచి ఇప్పటిదాకా ఆయన నటించిన చిత్రాలకు సంబంధించిన ఫొటోలు, పత్రికల్లో వచ్చిన కథనాలు సేకరించారు. తన కుడి చేతిపై ఎన్టీఆర్‌ చిత్రాన్ని, పేరును పచ్చబొట్టు పొడిపించుకున్నారు.  సీతారామపురం మండలం పెద్దనాగంపల్లికి చెందిన కామనూరు శ్రీనివాసులు(63) తన ఏడోఏట శ్రీకృష్ణ అవతారం చిత్రం చూసి ఎన్టీఆర్‌కు వీరాభిమానిగా మారిపోయారు. బెంగళూరులో తండ్రి ఆర్మీలో పనిచేస్తుండగా తదనంతరం ఇతను కూడా చేరి 2020 సెప్టెంబరులో పదవీ విరమణ పొందారు. అనంతరం పెద్దనాగంపల్లిలో స్థిరపడ్డారు. చిన్నప్పటి నుంచి ఎన్టీఆర్‌ నటించిన చిత్రాలను సేకరించి ఫ్రేములు కట్టించి తన ఇంట్లో ఏర్పాటు చేసుకున్నారు. శ్రీనివాసులు ‘న్యూస్‌టుడే’తో మాట్లాడుతూ సుమారు 80 చిత్రాలు ఉండగా, బెంగళూరులోని ఇంట్లో మరో 40 ఫొటోలున్నాయని, కుమారుడు శ్రీధర్‌ సైతం బాలకృష్ణకు వీరాభిమాని అని వివరించారు. కామనూరు శ్రీనివాసులు మాట్లాడుతూ 56 ఏళ్లుగా ఎన్టీఆర్‌ అభిమానినని, అయన పేరుతో మరిన్ని సేవాకార్యక్రమాలు నిర్వహిస్తామని పేర్కొన్నారు.

చేతిపై ఎన్టీఆర్‌ పచ్చబొట్టు