మండలాల ఖాళీ స్థానాలకు 3న ఎన్నిక

ప్రక్రియ ప్రారంభం

నెల్లూరు(జడ్పీ), న్యూస్‌టుడే : రాష్ట్ర ఎన్నికల కమిషన్‌ ఆదేశాల మేరకు జిల్లాలో ఖాళీగా ఉన్న మండలాల స్థానాలను భర్తీ చేసేందుకు ఎన్నిక ప్రక్రియను అధికారులు మొదలు పెట్టారు. దీనికి సంబంధించిన ఆదేశాలను కలెక్టర్‌ చక్రధర్‌బాబు శనివారం విడుదల చేశారు. జడ్పీ సీఈవో చిరంజీవి ఆధ్వర్యంలో ఈ ప్రక్రియ ప్రారంభించారు. ఇందులో భాగంగా జలదంకి మండల కోఆప్షన్‌ సభ్యుడు, వెంకటాచలం ఉపాధ్యక్ష పదవి, పొదలకూరు మండల పరిధిలోని తోడేరు పంచాయతీకి ఉప సర్పంచి స్థానానికి ఫిబ్రవరి 3న ఎన్నిక నిర్వహించాలని నిర్ణయించారు. స్థానిక ఎంపీడీవోల ఆధ్వర్యంలో జరిగే ఈ ఎన్నిక నిర్వహణకు ప్రత్యేక అధికారులను నియమించారు. దీనికి సంబంధించిన కార్యాచరణను జడ్పీ అధికారులు వెల్లడించారు.

* జనవరి 30వ తేదీలోగా ఫారం 2 ప్రకారం మండలాల సభ్యులకు ఎన్నిక నోటీసు ఇవ్వాలి.

* ఫిబ్రవరి 3వ తేదీ ఉదయం 10 నుంచి నామినేషన్లు వేయాలి.

* 12 గంటల్లోగా నామినేషన్లను పరిశీలించాలి. వెంటనే పోటీలో ఉన్న అభ్యర్థుల పేర్లు ప్రకటించాలి.

* ఒంటి గంటలోపు నామినేషన్‌ ఉపసంహరించుకోవచ్చు.

* మధ్యాహ్నం 3 గంటల నుంచి సభ్యులతో ప్రత్యేక సమావేశం నిర్వహించి పరోక్ష పద్ధతిలో ఆయా అభ్యర్థులను ఎన్నుకోవాల్సి ఉంటుంది.

* ఎన్నికైనా అభ్యర్థులను వెంటనే సభ్యుల ముందే ప్రకటిస్తారు.

* ఏ కారణం చేతనైనా ఎన్నిక వాయిదా పడితే.. మరుసటి రోజు ఎన్నిక నిర్వహించాల్సి ఉంటుంది.