సింహపురి ఎక్స్‌ప్రెస్‌కు ఎల్‌హెచ్‌బీ కోచ్‌ల ఏర్పాటు

నెల్లూరు(రైల్వేస్టేషన్‌) : గూడూరు- సికింద్రాబాద్‌- సింహపురి ఎక్స్‌ప్రెస్‌ మార్చి 13వ తేదీ నుంచి గంటకు 130 కి.మీ. వేగంతో పయనించనుంది. రైల్వేశాఖ రైళ్ల వేగాన్ని ప్రస్తుతం ఉన్న 110 కి.మీ. నుంచి 130 కి.మీ. పెంచింది. గత ఏడాది సెప్టెంబరు నాటికే ట్రాక్‌ను సైతం ఆ మేరకు పునరుద్ధరించింది. ఇప్పుడు ఆ వేగాన్ని అందుకునేందుకు వీలుగా ప్రస్తుతం ఉన్న కోచ్‌ల స్థానంలో ఎల్‌హెచ్‌బీ(లింక్‌ హాఫ్‌మ్మాన్‌ బుష్క)అనే కొత్త కోచ్‌లు అమర్చాలని నిర్ణయించారు. సికింద్రాబాద్‌- గూడూరు- సికింద్రాబాద్‌ ఎక్స్‌ప్రెస్‌ రైలుకు మార్చి 13 నుంచి ఈ ప్రత్యేక ఎల్‌హెచ్‌బీ కోచ్‌లు అమర్చుతున్నట్లు విజయవాడ రైల్వే డివిజనల్‌ అధికారులు మంగళవారం తెలిపారు. 

రోజూ మెము రైళ్లు

బిట్రగుంట : విజయవాడ-బిట్రగుంట(07978), బిట్రగుంట-విజయవాడ(07977) మెము రైళ్లు బుధవారం నుంచి రోజూ ప్రయాణికులకు అందుబాటులో ఉంటాయని ఉన్నతాధికారుల నుంచి బిట్రగుంట ఎస్‌ఎస్‌ కార్యాలయానికి మంగళవారం సమాచారం అందింది. గతంలో ఎగువ మార్గంలో వెళ్లే 07978 విజయవాడ-బిట్రగుంట రైలు శుక్రవారం,  07977 బిట్రగుంట-విజయవాడ రైలు ఆదివారం లేకపోవడంతో వారానికి 6 రోజులు మాత్రమే రాకపోకలు సాగించేవి. బుధవారం నుంచి ప్రతిరోజూ నడుస్తాయని, ఈ రైళ్ల సేవలను ప్రయాణికులు ఉపయోగించుకోవాలని రైల్వే అధికారులు పేర్కొన్నారు.