హమ్మయ్యా.. పిల్లర్లు తొలగించారు

నాగులవరం(బిట్రగుంట), న్యూస్‌టుడే: బోగోలు మండలం నాగులవరంలో నిర్మాణంలోని పాఠశాల భవన సముదాయంలో ముందుకు జరిగిన పిల్లర్లను ఆదివారం తొలగించారు. పక్కాగా కొత్త పిల్లర్లు నిర్మించేందుకు అవసరమైన ఆదేశాలు ఇచ్చారు. ఆదివారం ‘బాబోయ్‌..పిల్లర్లు ముందుకు జరిగాయి’ అనే శీర్షికన ఈనాడు ప్రచురించిన కథనానికి నాడు-నేడు జిల్లా ఇంజినీరింగు అధికారులు స్పందించారు. ఈఈ శ్రావణ్‌కుమార్‌, ఏఈ మస్తానయ్య ఆదివారం నాగులవరంలో రూ.1.91 కోట్లతో నిర్మించనున్న ఉన్నత పాఠశాల భవన పనులు పరిశీలించారు. ముందుకు జరిగిన పిల్లర్లను జేసీˆబీ యంత్ర సాయంతో పూర్తిగా తొలగించే పనులు పర్యవేక్షించారు. తప్పిదాలకు అవకాశం లేకుండా..నాణ్యతలో రాజీ పడకుండా పనులు చేయించాలని దిగువ శ్రేణి అధికారులకు సూచనలు ఇచ్చారు. ఆయన వెంట భవన నిర్మాణ కమిటీ బృందం ఉంది.