క్రమం తప్పకుండా పరిశ్రమల వార్షిక సర్వే

మాట్లాడుతున్న ఉప ప్రాంతీయ కార్యాలయాధికారి వై.ఫణీంద్రశర్మ

నెల్లూరు (కలెక్టరేట్‌), న్యూస్‌టుడే: జాతీయ గణాంక కార్యాలయం 1960 నుంచి పరిశ్రమలపై వార్షిక సర్వే క్రమంతప్పకుండా నిర్వహిస్తుందని ఉప ప్రాంతీయ కార్యాలయాధికారి వై.ఫణీంద్రశర్మ తెలిపారు. శుక్రవారం నెల్లూరులోని శెట్టి శేషారెడ్డి విజ్ఞాన కేంద్రంలో తయారీ సంస్థలు, పరిశ్రమల యజమానులు, నిర్వాహకులకు వార్షిక పరిశ్రమల సర్వే రిటర్ను దాఖలుపై జిల్లా స్థాయిలో అవగాహన సదస్సు నిర్వహించారు. ఈ సందర్భంగా ఆయన మాట్లాడుతూ దేశంలో పారిశ్రామిక ప్రగతిని అంచనా వేసేందుకు ఈ సర్వే ద్వారా సేకరించిన సమాచారం ఉపయోగపడుతుందన్నారు. ఏఎస్‌ఐ రిటర్ను దాఖలు చేసేందుకు కావాల్సిన ఆడిట్‌ రిపోర్టును ఉపయోగించి, వెబ్‌ మాధ్యమం ద్వారా నింపి ప్రభుత్వానికి దాఖలు చేయడంపై అవగాహన కల్పించారు. సదస్సులో సీనియర్‌ గణాంకాధికారులు ఫజులుల్లా, టి.రామకృష్ణ, వి.బాబు తదితరులు పాల్గొన్నారు.