ఎస్‌బీఐ బాండ్లు ఇప్పిస్తామని మోసం

నెల్లూరు (నేర విభాగం), న్యూస్‌టుడే : ఎస్‌బీఐ బాండ్లు ఇప్పిస్తామని రూ.10 లక్షల మోసం చేసిన ఘటనపై నవాబుపేట పోలీసులు బుధవారం కేసు నమోదు చేసి దర్యాప్తు చేస్తున్నారు. పోలీసుల కథనం మేరకు.. ఎన్‌సీ బాలయ్య నగర్‌లో విశ్రాంత అధ్యాపకులు జయరామయ్య నివాసముంటున్నారు. ఆయనకు దర్గామిట్ట బ్రాంచి  మేనేజరు వై.హనుమంతరావు పరిచయమయ్యారు. ఎస్‌బీఐ లైఫ్‌ ఇన్సూరెన్సులో నగదు జమ చేయాలని, దానికి బాండ్లు ఇస్తామని నమ్మబలికాడు. ఈ క్రమంలో విడతల వారీగా జయరామయ్య వద్ద రూ.10,90,875 వసూలు చేశాడు. నగదుకు సంబంధించి బాండ్లు అందజేయాలని కోరినా నకిలీ బాండ్లు అందజేశారు. దీనిపై మోసపోయినట్లు గుర్తించిన ఆయన.. నవాబుపేట పోలీసులకు ఫిర్యాదు చేశారు. పోలీసులు కేసు నమోదు చేసి దర్యాప్తు చేస్తున్నారు.