రైలు కిందపడి మహిళ మృతి

ఉలవపాడు, న్యూస్‌టుడే: ఉలవపాడు రైల్వే స్టేషన్‌లో ఎగువ లైన్‌లో సాయంత్రం ఎక్స్‌ప్రెస్‌ ట్రెయిన్‌ ఢీకొని గుర్తుతెలియని మహిళ మృతి చెందింది. స్థానికులు తెలిపిన వివరాలిలా ఉన్నాయి. ఉలవపాడు పండు మార్కెట్లో చిరు వ్యాపారులు మామిడి కాయలు కొనుగోలు చేసి రోజూ గూడూరు-విజయవాడ రైలుకు ఒంగోలు నుంచి బాపట్ల వరకు ప్రయాణిస్తుంటారు. ఎప్పటిలాగే శుక్రవారం కూడా ఉలవపాడు పండు మార్కెట్లో మామిడి కాయలు కొనుగోలు చేసిన చిరువ్యాపారులు ట్రేలలో కాయలను రైల్వేస్టేషనుకు తరలించారు. విజయవాడ వెళ్లే రైలు 4గంటల 21నిమిషాలకు మూడు నాలుగు ప్లాట్‌ఫాంల మధ్యలైన్‌లో నిలిపారు. వ్యాపారులు ఒక్కసారిగా ట్రేలతో రైలు ఎక్కేందుకు ప్రయత్నిస్తుండగా చెన్నై వైపు వెళ్తున్న సూపర్‌ఫాస్ట్‌ ఎక్స్‌ప్రెస్‌ రైలును గమనించని ఒక మహిళ రైలు కిందపడి ప్రాణాలొదిలింది.