జీజీహెచ్‌కు రూ.95 లక్షలు మంజూరు

కలెక్టరు హరినారాయణన్‌

నెల్లూరు(జీజీహెచ్‌), న్యూస్‌టుడే: జిల్లా ప్రభుత్వాసుపత్రి అభివృద్ధి, నిర్వహణకు రూ.95 లక్షలు విడుదల చేస్తూ డీఎంఈ గురువారం ఉత్తర్వులు జారీ చేశారు. ఆసుపత్రిలో లిఫ్టులు, ఏసీలు, రక్త పరీక్షల మెరుగుదల, ఇతర పెండింగ్‌లో ఉన్న మరమ్మతులు చేపట్టేందుకు అవసరమైన నివేదికను ఇటీవల కలెక్టరు హరినారాయణన్‌ డీఎంఈకి పంపారు. ఈ నేపథ్యంలో రూ.95 లక్షలు మంజూరు చేస్తూ ఆదేశాలు జారీ చేశారు.

లిఫ్టులు, ఏసీల మరమ్మతుకు ఆదేశాలు.. కలెక్టరేట్‌ (నెల్లూరు) : నెల్లూరు జీజీహెచ్‌లో లిఫ్టులు, ఏసీలకు పూర్తిస్థాయిలో మరమ్మతులు చేయించాలని, నిర్వహణ కోసం టెండర్లు పిలవాలని కలెక్టర్‌ తెలిపారు. గురువారం తన కార్యాలయంలో వైద్య సిబ్బందితో సమీక్షించారు. రోగులకు అసౌకర్యం కలగకుండా చర్యలు చేపట్టాలన్నారు. పొక్లెయిన్‌తో పరిసరాలు శుభ్రం చేయించాలని ఆదేశించారు. జీజీహెచ్‌ సూపరింటెండెంట్‌ సిద్ధానాయక్‌, ఏపీఎంఎస్‌ఐడీసీ ఈఈ కె.ఉమాశంకర్‌, డీఈ సాంబశివరావు పాల్గొన్నారు. అంతకుముందు ఆయన ప్రభుత్వ వైద్యశాలల్లో అందుతున్న సేవలపై సమీక్షించి.. వైద్యులు, సిబ్బందికి దిశా నిర్దేశం చేశారు.