పే స్కేల్ అమలు చేయాలని వీఆర్‌ఏల ఆందోళన

బీర్కూరు : పే స్కేల్‌ అమలు చేయాలని డిమాండ్‌ చేస్తూ ఆదివారం మండల కేంద్రంలోని తహసీల్దార్ కార్యాలయం వద్ద వీఆర్‌ఏలు ఆందోళన చేపట్టారు. ఈ సందర్భంగా వీఆర్‌ఏల మండల సంఘం అధ్యక్షుడు గంగాధర్‌ మాట్లాడుతూ ప్రభుత్వం ఏడాదిన్నర క్రితం తమకు పే స్కేల్ అమలు చేస్తామని హామీ ఇచ్చిందని, ఇప్పటి వరకు అమలుకు నోచుకోకపోవడం శోచనీయమని పేర్కొన్నారు. పే స్కేల్‌ అమలు చేయకపోవడంతో మనస్తాపం చెంది మాచారెడ్డి మండలం ఘన్‌పూర్‌ వీఆర్‌ఏ చల్లా రమేశ్‌ ఆత్మహత్య చేసుకున్నాడని, వారి కుటుంబాన్ని ప్రభుత్వం ఆదుకోవాలని డిమాండ్‌ చేశారు. ఈ కార్యక్రమంలో సంఘం ఉపాధ్యక్షుడు రవి, ప్రధాన కార్యదర్శి విజయ్‌, సలహాదారుడు గౌస్‌, సభ్యులు మోహన్‌, అంబయ్య, వీరేశం, పోశవ్వ, రుక్కవ్వ తదితరులు పాల్గొన్నారు.