‘మానసిక వేధింపులు తగవు’

ప్రిన్సిపల్‌ కుర్చీకి వినతిపత్రం ఇస్తున్న ఫిజిక్స్‌ ఒప్పంద అధ్యాపకురాళ్లు సరిత, శ్రీమాత

భిక్కనూరు, న్యూస్‌టుడే: కొందరు తమపై తప్పుడు ఆరోపణలు చేస్తూ మానసిక వేధింపులకు గురిచేస్తున్నారని తెవివి దక్షిణ ప్రాంగణం ఫిజిక్స్‌ విభాగం ఒప్పంద అధ్యాపకులు సరిత, శ్రీమాత అన్నారు. బుధవారం ఈ విషయంపై ప్రిన్సిపల్‌కు వినతిపత్రం ఇవ్వడానికి వెళ్లగా.. ఎవరూ లేకపోవడంతో ఖాళీ కుర్చీకి పెట్టి నిరసన తెలిపారు. తమ నియామకం పాలకమండలి ఆమోదంతో నిబంధనల ప్రకారమే జరిగిందన్నారు. విభాగాధిపతి ఆదేశాలతోనే ఓ విద్యార్థి దీక్ష పేరుతో తమ పరువుకు భంగం కలిగిస్తున్నారని ఆరోపించారు. గతంలోనూ ఇదే విధంగా వేధింపులకు గురి చేయడంతో అప్పటి ఒప్పంద అధ్యాపకులు వెళ్లిపోయారని చెప్పారు. మహిళలపై తప్పుడు ఆరోపణలు చేస్తే చట్టపరమైన చర్యలు తీసుకుంటామని పేర్కొన్నారు.