అభివృద్ధి బాటలో...

 మెదక్‌- భైంసా ఎన్‌హెచ్‌ నిర్మాణానికి సర్వే
 కరీంనగర్‌- పిట్లం నాలుగు వరుసల రోడ్డుకు ప్రతిపాదనలు
ఈనాడు డిజిటల్‌, కామారెడ్డి

పూర్తయిన ఎస్‌-ఎన్‌-ఎ-161 జాతీయ రహదారి

వ్యవసాయ, పారిశ్రామిక రంగాల అభివృద్ధిలో కీలకపాత్ర పోషించేవి రహదారులే. వీటి అభివృద్ధిపైనే ఆయా ప్రాంతాల ప్రగతి ఆధారపడి ఉంటుంది. దేశంలో చాలా జిల్లాలు జాతీయ రహదారుల కారణంగా ఎంతో అభివృద్ధిని సాధించాయి. జిల్లా నుంచి రాజధానికి ఎన్‌హెచ్‌- 44 వెళ్తుండగా మరో ఎస్‌-ఎన్‌-ఎ-161 నిర్మాణ పనులు తుది దశకు చేరుకున్నాయి. కొత్తగా మంజూరైన మెదక్‌- భైంసా జాతీయ రహదారి కోసం భూసేకరణ చేపడుతున్నారు. జిల్లాకేంద్రం మీదుగా వెళ్లే కరీంనగర్‌- పిట్లం రోడ్డును ఎన్‌హెచ్‌గా మార్చేందుకు ఆర్‌అండ్‌బీ అధికారులు ప్రతిపాదనలు పంపించారు. వీటితో జిల్లా రూపురేఖలు మారనున్నాయి. పారిశ్రామికంగా పురోగమిస్తుంది. ఈ నేపథ్యంలో ఆయా నిర్మాణాల స్థితిగతులు, భూసేకరణపై ప్రత్యేక కథనం.
తుది దశకు..
* కేంద్ర ప్రభుత్వం అయిదేళ్ల క్రితం సంగారెడ్డి- నాందేడ్‌- అకోలా(ఎస్‌ఎన్‌ఏ- 161) జాతీయ రహదారి విస్తరణకు రూ.2380 కోట్లు మంజూరు చేసింది.
* మూడు ప్యాకేజీలుగా విభజించి రెండు వరుసలుగా ఉన్న 130 కిలోమీటర్ల రోడ్డును నాలుగు వరుసలుగా విస్తరించేందుకు పనులు చేపట్టారు.
* మూడో ప్యాకేజీ కింద నిజాంసాగర్‌ మండలం నర్సింగరావుపల్లి చౌరస్తా నుంచి మద్నూర్‌ మండలం సలాబత్‌పూర్‌ వరకు 49 కి.మీ. మేర విస్తరణ పనులు పూర్తి చేశారు.
* రెండ్రోజుల కిందట పిట్లం మండలంలోని ధర్మారం వద్ద ఏర్పాటు చేసిన టోల్‌ప్లాజాను ప్రారంభించి టోల్‌ వసూలు చేస్తున్నారు.
* మొదటి, రెండో ప్యాకేజీల కింది మిగిలిన పనులను మూడు నెలల్లో పూర్తి చేసేందుకు యుద్ధప్రాతిపదికన ఏర్పాట్లు చేస్తున్నారు.
ఎన్నో ఉపయోగాలు
ఇటీవల రాష్ట్ర ప్రభుత్వం పలు మార్గాలను ఎన్‌హెచ్‌లుగా ప్రకటించాలని ప్రతిపాదనలు పంపించింది. ఇందులో కరీంనగర్‌- పిట్లం రహదారి ఉంది. 149 కి.మీ.ఉన్న ఈ రోడ్డును నాలుగు వరుసలుగా విస్తరించనున్నారు. ఇందులో కరీంనగర్‌, రాజన్న సిరిసిల్ల జిల్లాల పరిధిలో 73 కి.మీ. ఉండగా కామారెడ్డి జిల్లాలో 76 కి.మీ. ఉంది. ఇది ఈ మూడు జిల్లా కేంద్రాలను కలుపుతుంది. విపరీతంగా రద్దీ ఉండే ఈ మార్గం విస్తరణకు జాతీయ రహదారుల విభాగం ధ్రువ్‌ అనే సంస్థకు అప్పజెప్పింది.
హెచ్‌ఎంబీ కోసం భూసేకరణ
హైదరాబాద్‌- మెదక్‌- భైంసా(హెచ్‌ఎంబీ) రహదారిని కేంద్రం జాతీయ రహదారిగా ప్రకటించి విస్తరణ పనులకు శ్రీకారం చుట్టింది.

* 95 కి.మీ. ఉన్న ఈ రోడ్డు ఎల్లారెడ్డి రెవెన్యూ డివిజన్‌ పరిధిలో 32 కి.మీ, బాన్సువాడలో 32 కి.మీ, బోధన్‌ పరిధిలో 11 కి.మీ. ఉంది.

 * ఇప్పటికే ప్రాథమిక సర్వే పూర్తి కాగా భూసేకరణ కోసం రెవెన్యూ అధికారులు ఏర్పాట్లు చేస్తున్నారు.

* బాన్సువాడ డివిజన్‌ పరిధిలోని నర్వ, కొత్తబాది గ్రామాల్లో శుక్రవారం సర్వే చేపట్టి మార్కింగ్‌ చేయనున్నారు.

* ఇది పూర్తయితే బాన్సువాడ, ఎల్లారెడ్డి ప్రాంతాల ప్రజలు మెదక్‌ మీదుగా రాజధానికి చేరుకునే అవకాశం ఉంటుంది. ముఖ్యంగా బాన్సువాడ, ఎల్లారెడ్డి, జుక్కల్‌ నియోజకవర్గాలు పారిశ్రామికంగా అభివృద్ధి చెందే అవకాశాలున్నాయి.