ఇద్దరు ఏపీవోల సస్పెన్షన్‌

దస్త్రాలు పరిశీలిస్తున్న డీఆర్డీవో చందర్‌నాయక్‌, ఎంపీపీ భూమన్న

డిచ్‌పల్లి గ్రామీణం, న్యూస్‌టుడే: ఉపాధిహామీ పనులకు సంబంధించిన దస్త్రాల్లో కేవలం 50 శాతం మాత్రమే సమర్పించినందుకు ఏపీవోలు మంజుల, ఓంకార్‌ను(వీరు గతంలో డిచ్‌పల్లిలో పనిచేశారు) సస్పెండ్‌ చేసినట్లు డీఆర్డీవో చందర్‌నాయక్‌ తెలిపారు. డిచ్‌పల్లి మండల పరిషత్‌ కార్యాలయంలో శనివారం ఉపాధిహామీ పనులపై ప్రజావేదిక నిర్వహించారు. ఎంపీపీ గద్దె భూమన్న, ఎంపీడీవో నాగేంద్రప్ప, సహాయ విజిలెన్స్‌ అధికారి నారాయణ, రాష్ట్ర రీసోర్స్‌ పర్సన్లు అశోక్‌, దత్తు సమక్షంలో దస్త్రాలు పరిశీలించారు. డీఆర్డీవో చందర్‌ మాట్లాడుతూ.. మండలంలో 34 గ్రామ పంచాయతీల్లో 2019 - 2022 మార్చి 31 వరకు ఉపాధి హామీ కింద రూ.16.74 కోట్ల పనులు చేపట్టినట్లు తెలిపారు. నడిపల్లి పరిధిలో దీనికి సంబంధించిన దస్త్రాలను కేవలం 50 శాతం మాత్రమే సమర్పించారని గుర్తుచేశారు. మిగతావి పంపాలని నోటీసులు ఇచ్చినా స్పందన లేకపోవడంతో సస్పెండ్‌ చేసినట్లు చెప్పారు. తొలిరోజు ఏడు గ్రామాల దస్త్రాలను పరిశీలించారు. ఆదివారం సైతం ప్రజావేదిక కొనసాగుతుందని డీఆర్డీవో తెలిపారు.