బాన్సువాడలో భారీ చోరీ

చైతన్యకాలనీలో చోరీ జరిగిన ఇంటిని పరిశీలిస్తున్న సీఐ రాజశేఖర్‌రెడ్డి

బాన్సువాడ, న్యూస్‌టుడే: పట్టణంలోని చైతన్యకాలనీలోని ఇంటి తాళం పగులగొట్టి రూ.29.40 లక్షలను గుర్తు తెలియని వ్యక్తులు అపహరించినట్లు సీఐ రాజశేఖర్‌రెడ్డి తెలిపారు. వివరాల ప్రకారం...తన కుటుంబ సభ్యులతో కలిసి విశ్రాంత ప్రధానోపాధ్యాయుడు వీరగంధం నాగేశ్వరరావు ఈ నెల 22వ తేదీ ఉదయం కోటగిరి మండలం ఎక్లాస్‌పూర్‌ క్యాంపులో మేనకోడలు పుట్టుపంచలు ఉండటంతో వెళ్లారు. అదే రోజు రాత్రి పది గంటలకు వచ్చే సరికి ఇంటి తాళం పగులగొట్టి ఉంది. లోపలికి వెళ్లి చూడగా రూ.29.40 లక్షల నగదు అహపరించినట్లు గుర్తించి పోలీసులకు ఫిర్యాదు చేశారు. తన అల్లుడు రాము ఇటీవల మహబూబ్‌నగర్‌లో వ్యవసాయ భూమి విక్రయించగా వచ్చిన నగదును ఇంట్లో పెట్టినట్టు బాధితుడు తెలిపారు. ఘటనా స్థలాన్ని బాన్సువాడ డీఎస్పీ జైపాల్‌రెడ్డి, సీఐ రాజశేఖర్‌రెడ్డి పరిశీలించారు. కేసు నమోదు చేసి దర్యాప్తు చేస్తున్నట్లు చెప్పారు.