రాయలసీమ ట్రయల్‌ రన్‌

బోధన్‌ పట్టణం, న్యూస్‌టుడే : నిజామాబాద్‌-తిరుపతి మధ్య నడిచే రాయలసీమ ఎక్స్‌ప్రెస్‌ రైలును నిజామాబాద్‌-బోధన్‌ మధ్య ప్రయోగాత్మకంగా నడిపారు. గురువారం ఉదయం 10:30 బయల్దేరిన రైలు 11:30కు బోధన్‌ చేరుకుంది. బోగీలు శుభ్రం చేయించాక 12:30కు నిజామాబాద్‌ బయల్దేరింది. కొన్నాళ్లుగా దీన్ని బోధన్‌ వరకు పొడిగించాలని డిమాండ్‌ ఉంది. ఈ నేపథ్యంలో ప్రయోగాత్మకంగా నడిపి పరిస్థితులను అంచనా వేస్తున్నారు. భద్రత, పట్టాల సామర్థ్యం, పారిశుద్ధ్య పనులు తదిర ఐదు రకాల సాంకేతిక అంశాలను పరిశీలించి ఉన్నతాధికారులకు నివేదిక పంపనున్నారు. అనంతరం పొడిగింపుపై నిర్ణయం వెలువడుతుంది. రైలు రావడంతో పలువురు స్టేషన్‌కు రాగా అనుమతి లేదనడంతో వెనుదిరిగారు. సీనియర్‌ సెక్షన్‌ ఇంజినీర్‌ ఉదయ్‌కుమార్‌, ట్రాఫిక్‌ ఇన్‌స్పెక్టర్‌ అవినాష్‌ ఉన్నారు.