ప్రత్యామ్నాయ ఆదాయం

ఆర్టీసీకి రెండేళ్లలో రూ.6.72 కోట్ల రాబడి

కామారెడ్డి బస్టాండులో కార్గో కేంద్రం

న్యూస్‌టుడే, కామారెడ్డి పట్టణం: ప్రయాణికుల సంక్షేమమే ధ్యేయంగా సేవలందిస్తున్న ఆర్టీసీ ప్రత్యామ్నాయ ఆదాయంపై దృష్టి పెట్టింది. 2020 జూన్‌ 19న ప్రారంభించిన కార్గో ద్వారా సంస్థకు ఆదాయం సమకూరుతోంది. ఉభయ జిల్లాల్లోని ఆరు డిపోల పరిధిలో రూ.లక్షల్లో ఆదాయం వస్తోంది. ఇటీవల వినూత్న పథకాలతో ఆర్టీసీ ప్రజల ముందుకొస్తోంది. బాలల, మహిళా దినోత్సవం సందర్భంగా ఐదేళ్ల లోపు పిల్లలకు ఉచిత ప్రయాణ వసతి కల్పించింది. కార్గో ద్వారా బంగినపల్లి మామిడిపండ్లు, భద్రాచలం నుంచి సీతారామ కల్యాణ తలంబ్రాలు సరఫరా చేసింది. ఈ నెల 25 వరకు 5,61,431 పార్సిళ్లు, కొరియర్లు బుక్‌ చేయగా..  రూ.5.80 కోట్ల ఆదాయం సమకూ రింది. ఇక బస్సుల్లో సరకుల రాకపోకలు 1653 నమోదుకాగా..  రూ.92.15 లక్షల ఆదాయం సమకూరిందని  అధికార వర్గాలు వెల్లడించాయి.

తక్కువ ధరలో సేవలు - లక్కు మల్లేశం, డీఎం-కామారెడ్డి

ఆర్టీసీ సంస్థ ప్రవేశపెట్టిన కార్గో  సేవలను ప్రజలు సద్వినియోగం  చేసుకోవాలి. ప్రజల నమ్మకాన్ని వమ్ము చేయకుండా పారదర్శకమైన సేవలందించేందుకు కృషి చేస్తున్నాం.