వడ్డీ మాఫీకి చక్కటి స్పందన

ఆస్తిపన్ను లక్ష్యానికి మించి వసూలు
న్యూస్‌టుడే, కామారెడ్డి పట్టణం

కామారెడ్డిలో మజీద్‌ కాంప్లెక్స్‌ పన్ను రూ.1.90 లక్షలు చెల్లిస్తున్న ప్రతినిధులు

ఆస్తి పన్నుపై 90 శాతం వడ్డీ మాఫీ పథకానికి చక్కటి స్పందన లభించింది. లక్ష్యానికి మించి పన్ను వసూలైంది. క్షేత్రస్థాయిలో సిబ్బంది విస్తృత ప్రచారం చేయడంతో ఆశించిన ఫలితాలొచ్చాయి. భారీగా బకాయిపడిన యజమానులకు పలుమార్లు తాఖీదులు జారీ చేశారు. తప్పనిసరిగా చెల్లించాలని ఆదేశించారు. పురపాలక శాఖ నుంచి నిత్యం బల్దియాల నుంచి ఎంత పన్ను వసూలైందో నివేదికలు తెప్పించుకున్నారు. మునుపెన్నడూ లేని విధంగా ఈసారి భారీగా ఆదాయం రావడంతో అధికారులు ఆనందం వ్యక్తం చేస్తున్నారు. గతంలో 5శాతం వడ్డీ మాఫీకి స్పందన వచ్చింది. ముందస్తు చెల్లింపులతో రూ.కోటి మేర ఆదాయం సమకూరింది. 90 శాతం వడ్డీ మాఫీతో పురపాలికల ఖజానాకు కాసులు సమకూరాయని కామారెడ్డి బల్దియా ఆర్‌ఐ జానయ్య పేర్కొన్నారు. మిగతావారు సైతం సకాలంలో చెల్లించి పట్టణాభివృద్ధికి తోడ్పాటునందించాలని కోరారు.