బకాయిల వసూలుకు నెలన్నర గడువు

ఛైర్మన్‌ భాస్కర్‌రెడ్డి అధ్యక్షతన సమావేశమైన పాలకవర్గ సభ్యులు

నిజామాబాద్‌ వ్యవసాయం : ఉమ్మడి నిజామాబాద్‌ జిల్లా సహకార కేంద్ర బ్యాంకు(ఎన్డీసీసీబీ)లో పేరుకుపోయిన మొండి బకాయిల వసూలుకు(ఎన్‌పీఏ) మరో నెలన్నర రోజులు గడువు ఇవ్వడానికి పాలకవర్గం నిర్ణయం తీసుకుంది. ఛైర్మన్‌ భాస్కర్‌రెడ్డి అధ్యక్షతన శనివారం జరిగిన సమావేశంలో కీలక నిర్ణయాలు తీసుకున్నారు. నవంబర్‌ 15లోగా పూర్తిస్థాయిలో ఎన్‌పీఏలను వసూలు చేయాలని ఆదేశించారు. నాబార్డు ఆదేశాల ప్రకారం పట్టణ ప్రాంతాల్లో రూ.25 లక్షలు, గ్రామీణ ప్రాంతంలో రూ.20 లక్షల వరకు రుణాలివ్వాలని నిర్ణయించారు. విద్యార్థుల ఉన్నత చదువులకు రూ.20 లక్షలు ఇవ్వనున్నారు. అనంతరం సిబ్బంది బదిలీలపై చర్చించారు. నవంబర్‌ 19 నాటికి డీసీసీబీ ఏర్పడి వందేళ్లు పూర్తి చేసుకుంటున్న నేపథ్యంలో సంబరాల నిర్వహణపై మరోసారి సమావేశం కావాలని భావించారు. వైస్‌ ఛైర్మన్‌ రమేశ్‌రెడ్డి, మార్క్‌ఫెడ్‌ చైర్మన్‌ మార గంగారెడ్డి, లింగన్న, బోర్డు సభ్యులు, బ్యాంకు అధికారులు పాల్గొన్నారు.