సర్పంచి ఇంటి ఎదుట.. దంపతుల ఆత్మహత్యాయత్నం

గాంధారి, న్యూస్‌టుడే : భూతగాదా వ్యవహారంలో సర్పంచి ఇంటి ఎదుట భార్యాభర్తలు ఆత్మహత్యాయత్నానికి పాల్పడిన ఘటన గాంధారి మండలం సోమారంతండాలో శుక్రవారం చోటు చేసుకుంది. గ్రామస్థుల కథనం ప్రకారం... సర్పంచి కిషన్‌నాయక్‌ పదేళ్ల కిందట మండల కేంద్రంలో 250 గజాల స్థలాన్ని కొత్తబాది తండాకు చెందిన దంపతులు బానోత్‌ శంకర్‌, సునీతకు విక్రయించారు. స్థలం తక్కువగా ఉండటం, రిజిస్ట్రేషన్‌ కాకపోవడంతో ఇరువురి మధ్య గొడవలు జరిగాయి. పలుమార్లు పెద్దల సమక్షంలో పంచాయతీ నిర్వహించినా సమస్య పరిష్కారం కాలేదు. శంకర్‌, సునీత శుక్రవారం సర్పంచి ఇంటికి వెళ్లి రిజిస్ట్రేషన్‌ చేయాలని నిలదీశారు. ఈ క్రమంలో వెంట తెచ్చుకున్న గడ్డిమందు తాగారు. బాధితుల బంధువులకు విషయం తెలియడంతో అక్కడకు చేరుకొని సర్పంచి ఇంటిపై దాడిచేశారు. అనంతరం దంపతులిద్దరిని చికిత్స నిమిత్తం కామారెడ్డి జిల్లా ఆస్పత్రికి తరలించారు. అక్కడి నుంచి ఎల్లారెడ్డిపేటలో ఓ ప్రైవేటు ఆస్పత్రికి తరలించారు. ఈ ఘటనపై ఎస్సై రాజేశ్‌ను ‘న్యూస్‌టుడే’ వివరణ కోరగా ప్లాటు అమ్మిన విషయం వాస్తవమేనని, మొత్తం డబ్బులు చెల్లించకుండా రిజిస్ట్రేషన్‌ చేయించాలంటూ తనపై దాడికి దిగారని సర్పంచి కిషన్‌ నాయక్‌ ఫిర్యాదు చేశార[న్నారు. ఆత్మహత్యాయత్నానికి పాల్పడిన బాధితుల నుంచి ఎలాంటి ఫిర్యాదు అందలేదని పేర్కొన్నారు.