జ్వరం ఉందని జిల్లాస్పత్రిలో ప్రసవానికి నిరాకరణ

ప్రైవేటులో కవలలకు జన్మనిచ్చిన తల్లి

కామారెడ్డి వైద్యవిభాగం, న్యూస్‌టుడే: ప్రసవం నిమిత్తం జిల్లా ఆసుపత్రికి ఓ గర్భిణి రాగా ఆమెకు జ్వరం ఉందన్న చిన్నకారణంతో తమతో కాదని తిప్పి పంపించారు. పరిస్థితి విషమిస్తే గర్భంలో ఉన్న శిశువులకు ప్రమాదమని చెప్పి నిజామాబాద్‌ ఆసుపత్రికి సిఫారసు చేశారు. ఎలాగైనా వైద్యం చేయాలని బతిమిలాడినా నిరాకరించారని కుటుంబీకులు ఆరోపించారు. ఎంత సేపు వేచిచూసినా కనికరించకపోవడంతో ఓ ప్రైవేటు ఆసుపత్రికి తీసుకెళ్లగా కవలలు(ఆడ) జన్మనిచ్చారని తెలిపారు. ఈ ఘటనకు సంబంధించి వివరాలు ఇలా ఉన్నాయి.. కామారెడ్డి పరిధిలోని అడ్లూరు గ్రామానికి చెందిన రోజా ప్రవసం నిమిత్తం సోమవారం జిల్లా ఆసుపత్రికి వచ్చారు. స్కానింగ్‌ చేసిన వైద్యులు కవలలు ఉన్నట్లు గుర్తించారు. గర్భిణికి జ్వరం ఉందని నిజామాబాద్‌కు తీసుకెళ్లాలని సూచించారు. ఇప్పటికిప్పుడు అక్కడికి వెళ్లాలంటే కష్టమని ఇక్కడే ప్రసవం చేయాలని కుటుంబీకులు వైద్యులను కోరారు. వారు అంగీకరించకపోవడంతో ప్రైవేటు ఆసుపత్రికి వెళ్లగా అక్కడి వైద్యురాలు వెంటనే పురుడు పోశారు. ప్రస్తుతం తల్లీబిడ్డలు క్షేమంగా ఉన్నారు. సర్కారు ఆసుపత్రుల్లో ప్రసవాలు పెంచుతున్నామని ప్రభుత్వం చెబుతున్నా ఇక్కడ పరిస్థితులు వేరుగా ఉన్నాయని కుటుంబీకులు వాపోయారు. జ్వరం పేరిట తిప్పి పంపడం అన్యాయమని భర్త పరశురాం పేర్కొన్నారు. ఈ విషయమై జిల్లా ఆసుపత్రుల పర్యవేక్షణాధికారిణి డా.విజయలక్ష్మిని ‘న్యూస్‌టుడే’ వివరణ కోరగా.. గర్భిణికి అధిక జ్వరం రావడంతోనే నిజామాబాద్‌ ప్రభుత్వాసుపత్రికి సిఫారసు చేశామన్నారు. నిబంధనల మేరకు హైరిస్క్‌ కేసులకు ఇక్కడ వైద్యం అందించలేమని పేర్కొన్నారు.