పౌష్టికాహారం అందాలి.. మోము మెరవాలి

ఆన్‌లైన్‌లో అంగన్‌వాడీ సరకుల నమోదుకు శ్రీకారం

   అంగన్‌వాడీల్లో పౌష్టికాహారం పంపిణీ హాస్యాస్పదంగా మారింది. చిన్నారులు, గర్భిణులు, బాలింతలకు ఇవ్వకుండా పక్కదారి పట్టిస్తున్నట్లు విమర్శలు ఉన్నాయి.

ఆయా కేంద్రాల్లో అక్రమాలు కట్టడి చేసేందుకు సర్కారు అనేక చర్యలు తీసుకుంటోంది. తాజాగా న్యూట్రీషన్‌, హెల్త్‌ ట్రాకింగ్‌ సిస్టమ్‌ తీసుకొచ్చింది.

న్యూస్‌టుడే, ఖలీల్‌వాడి(నిజామాబాద్‌): జిల్లాలోని నిజామాబాద్‌, బోధన్‌, ఆర్మూర్‌, భీమ్‌గల్‌, డిచ్‌పల్లి ప్రాజెక్టుల పరిధిలో మొత్తం 1,500 అంగన్‌వాడీ కేంద్రాలున్నాయి. వీటిల్లో బాలింతలు 13625, గర్భిణులు 13241, ఆరేళ్ల లోపు చిన్నారులు 95,874 మంది నమోదై ఉన్నారు. వీరికి సరకులు, భోజనం, పాలు, గుడ్లు ఇచ్చిన తర్వాత వివరాలను దస్త్రాల్లో పొందుపర్చేవారు. ఇలా మ్యాన్‌వల్‌ విధానంతో కొన్నిచోట్ల అక్రమాలు జరుగుతున్నట్లు గుర్తించిన సర్కారు వీటికి చెక్‌ పెట్టాలని అంతర్జాలంలో నమోదుకు శ్రీకారం చుట్టింది. ఈ మేరకు గతేడాదే అంగన్‌వాడీ టీచర్లకు స్మార్ట్‌ఫోన్లు అందజేయడం గమనార్హం.

ఎప్పటికప్పుడు సమాచారం..

పోషకాల పంపిణీ నుంచి నిల్వల వరకు అంతా పారదర్శకంగా ఉండేలా డెయిలీ రిపోర్టు విధానాన్ని ప్రభుత్వం తీసుకొచ్చింది. అదే న్యూట్రీషన్‌, హెల్త్‌ ట్రాకింగ్‌ సిస్టమ్‌. ఇందులో ప్రతిరోజు లబ్ధిదారులు ఎందరు హాజరయ్యారు.. ఎంత మందికి భోజనం పెట్టారు.. తదితర పూర్తి సమాచారం యాప్‌లో నమోదు చేయాల్సి ఉంటుంది. తద్వారా జిల్లా, రాష్ట్రస్థాయిలో అధికారులు ఎప్పటికప్పుడు వివరాలు తెలుసుకునే వీలుంటుంది. దీనికితోడు ఏ కేంద్రంలో వేటి కొరత ఉందో సకాలంలో గుర్తించి అవసరమైన వాటిని సరఫరా చేసే వెసులుబాటు కలుగుతుంది.

సమస్యలు ఉంటే..

లబ్ధిదారుల హాజరు, పిల్లల ఎదుగుదల, శారీరక.. పోషకాహార లోపం ఉన్న చిన్నారుల వివరాలను పోషణ్‌ అభియాన్‌ యాప్‌లో నమోదు చేయాల్సి ఉంటుంది. దీనిని కేంద్ర ప్రభుత్వం అందుబాటులోకి తీసుకొచ్చింది.

పక్కాగా అమలు

- సుధారాణి, ఇన్‌ఛార్జి జిల్లా సంక్షేమాధికారిణి

పోషకాహార పంపిణీ, నిల్వలు అంతా పారదర్శకంగా ఉండేలా ప్రభుత్వం న్యూట్రీషన్‌, హెల్త్‌ ట్రాకింగ్‌ సిస్టమ్‌ తీసుకొచ్చింది. జిల్లాలోని అన్ని ప్రాజెక్టుల్లో పక్కాగా అమలు చేయిస్తున్నాం.