విద్యుత్‌ కోతలకు నిరసనగా ఆందోళన

బాల్కొండ: మెండోరా మండలం సవెల్‌లో వ్యవసాయ రంగానికి ఎదురవుతున్న సమస్యలకు నిరసనగా రైతులు 33/11 కేవీ విద్యుత్‌ ఉపకేంద్రం ఎదుట బుధవారం ఆందోళన చేశారు. వ్యవసాయానికి అందిస్తున్న త్రీ ఫేజ్‌ విద్యుత్‌ సక్రమంగా రావడం లేదని, తరచూ కోతలు విధిస్తున్నారని రైతులు ఆందోళన వ్యక్తం చేశారు. ప్రభుత్వం 24గంటలు విద్యుత్‌ అందిస్తుందన్న నమ్మకంతో తాము పంటలు వేశామని, కానీ సక్రమంగా విద్యుత్‌ సరఫరా లేక పంటలు ఎండిపోతున్నాయని ఆవేదన వ్యక్తం చేశారు. సమస్యను పరిష్కరించాలని కోరుతూ ట్రాన్స్‌కో ఏఈ అంజద్‌ బాషాకు వినతి పత్రం అందజేశారు. గ్రామ కమిటీ సభ్యులతో పాటు రైతులు పాల్గొన్నారు.