శ్రీక్షేత్రం ఎంతో మారింది

ఆంధ్రా భక్తుల ఆనందం

స్వామి దర్శనానికి వచ్చిన భక్తులు

పూరీ నుంచి న్యూస్‌టుడే బృందం: పూరీ శ్రీక్షేత్రం రెండేళ్ల క్రితంతో పోలిస్తే ఎంతో మారిందని, దర్శనాలకు సులువుగా ఉందని ఆంధ్రప్రదేశ్‌ రాష్ట్రం విశాఖపట్నం జిల్లాలోని దేవరాపల్లికి చెందిన సత్యనారాయణ, సింహాచలం, వెంకటరమణ చెప్పారు. బుధవారం పూరీ వచ్చిన ఈ ముగ్గురు ‘న్యూస్‌టుడే’తో మాట్లాడారు. జగన్నాథుడు తమ ఆరాధ్య దైవమని, 30 ఏళ్లుగా ఏటా రథయాత్రకు వస్తున్నట్లు తెలిపారు. కొవిడ్‌ కారణంగా రెండేళ్లు స్వామి యాత్రకు రాలేకపోయామన్నారు. 2019లో శ్రీక్షేత్ర ఆవరణ ఇరుకుగా ఉండేదని, ఇప్పుడు విశాలంగా ఉందన్నారు. అప్పట్లో సౌకర్యాలు సరిగా లేవని, ఇప్పుడు బాగున్నాయని సంతోషం వ్యక్తం చేశారు. బొడొదండోలో శుచి, శుభ్రత బాగున్నాయని, పవిత్రత కనిపిస్తోందన్నారు. ఆహారానికి ఇబ్బంది లేదని, స్వామి ఒబడా (మహాప్రసాదం)ను ఆరగించామన్నారు. జగన్నాథుని తనివితీరా దర్శనం చేసుకున్నామని పేర్కొన్నారు.