చెట్టును ఢీకొన్న ద్విచక్రవాహనం: కానిస్టేబుల్‌ మృతి

మాచ్‌ఖండ్‌, న్యూస్‌టుడే: ద్విచక్రవాహనం అదుపు తప్పి చెట్టును ఢీకొన్న ఘటనలో కానిస్టేబుల్‌ మృతి చెందిన ఘటన చర్చనీయాంశమైంది. నందాపూర్‌ ఎస్‌డీపీవో సంజయ్‌మహపాత్ర్‌ తెలిపిన వివరాల ప్రకారం.. జోలాపుట్‌ అవుట్‌పోస్టులో కానిస్టేబుల్‌గా పనిచేస్తున్న ధనపతిఅంగెల్‌ బుధవారం రాత్రి విధులు ముగించుకుని ద్విచక్రవాహనంపై  కొరాపుట్‌ వెళ్తుండగా ఈ ఘటన జరిగింది. ఇంటికి ఇంకా రాకపోవడంతో కుటుంబసభ్యులే జోలాపుట్ సోగూరు మార్గమధ్యలోని బిల్లాపుట్‌ వద్ద పడి ఉన్న ధనపతిని గుర్తించారు. విషయం తెలుసుకున్న నందపూర్‌ ఎస్‌డీపీవో సంజయ్‌ మహపాత్ర్‌ ఘటనాస్థలానికి చేరుకుని దర్యాప్తు ప్రారంభించారు. గంజాయి వ్యాపారులు ఏమైనా చేసుంటారన్న అనుమానంతో డాగ్‌ స్వ్కాడ్‌, సాంకేతిక బృందంలో పరిశీలించారు. అలాంటి ఆనవాళ్లు ఏమీ కనిపించకపోవడంతో అతివేగం వలనే ప్రమాదం జరిగినట్లు నిర్ధారించారు.