బీమా మొత్తం ఇవ్వకుంటే సామూహిక ఆత్మహత్యలే

బొలంగీర్‌ జిల్లాలో రైతుల ఆందోళన

హరిశంకర్‌ రైల్వే స్టేషన్లో పట్టాలపై బైఠాయించిన రైతులు

కటక్‌, న్యూస్‌టుడే: బొలంగీర్‌ జిల్లాలో నష్టపోయిన రైతులకు వ్యవసాయ బీమా మొత్తాలు చెల్లించాలని డిమాండ్‌ చేస్తూ సోమవారం పలు ప్రాంతాల్లో రైలురోకో నిర్వహించారు. దీంతో ఆ మార్గంలో రైళ్ల రాకపోకలకు అంతరాయం ఏర్పడింది. బొలంగీర్‌ రైల్వే స్టేషన్‌, హరిశంకర్‌, టిట్లాగఢ్‌ రైల్వేస్టేషన్‌ వద్ద వందలాదిమంది రైతులు రైలు పట్టాలపై ధర్నా చేపట్టారు. వారిని అడ్డుకోవడంలో పోలీసులు చేసిన ప్రయత్నాలు విఫలమయ్యాయి. ఉదయం 11 గంటల నుంచి మధ్యాహ్నం రెండు గంటల వరకు రైతులు రైలు పట్టాలపై కూర్చున్నారు. దీంతో ఆ మార్గంలో రైళ్ల రాకపోకలు నిలిచిపోయాయి. ఆందోళనకారులు అందించిన వివరాల ప్రకారం... గత ఏడాది జిల్లాలో కరవు ఏర్పడి వందలాదిమంది రైతులు ఆర్థికంగా దెబ్బతిన్నారు. బీమా మొత్తాలు చెల్లించాలని, రైతులకు ఆదుకోవాలని చాలాసార్లు రైతులు జిల్లాలోని వివిధ ప్రాంతాల్లో ఆందోళనలు చేపట్టారు. బీమా సంస్థ నుంచి ఎలాంటి స్పందన రాలేదు. పంటనష్టంపై జిల్లా యంత్రాంగం తప్పుడు వివరాలు అందించిందని ఆరోపిస్తూ బీమా సంస్థ మొత్తాలు విడుదల చేయడం లేదు. ఈ సందర్భంగా రైతులు మాట్లాడుతూ బీమా మొత్తాలు ఇవ్వకపోతే సామూహిక ఆత్మహత్యలు చేసుకుంటామని హెచ్చరించారు. పోలీసులు ఆందోళనకారులతో చర్చించి పరిస్థితిని చక్కదిద్దారు. బొలంగీర్‌ జిల్లా రైతుల సంఘం ఆధ్వర్యంలో ఈ ఆందోళనలు జరిగాయి.