ఎమ్కేసీజీలో రూ.55 కోట్లతో ‘క్యాన్సర్‌ కేర్‌ సెంటర్‌’

భవనం నమూనా

బ్రహ్మపుర నగరం, న్యూస్‌టుడే: స్థానిక ఎమ్కేసీజీ వైద్య కళాశాల ఆసుపత్రిలో రూ.55 కోట్ల వ్యయంతో కొత్తగా ‘క్యాన్సర్‌ కేర్‌ సెంటర్‌’ నిర్మాణం కానుంది. ఎమ్కేసీజీ ఆవరణలోని మైదానం సమీపాన 14,500 చదరపు అడుగుల విస్తీర్ణంలో నాలుగు అంతస్తుల భవనం నిర్మాణం పనులను కోల్‌కతాకు చెందిన ఓ గుత్త సంస్థ టెండరు దక్కించుకుంది. త్వరలోనే పనులు మొదలవుతాయని రోడ్లు, భవనాల శాఖ ఎమ్కేసీజీ జూనియరు ఇంజినీరు కుళమణి ఎక్కా బుధవారం విలేకరులకు తెలిపారు. ఈ భవనంలో వంద పడకల ఇండోర్‌ వార్డు, ఔట్‌డోర్‌, రోగుల బంధువుల విశ్రాంతి గృహం, వైద్యులు, వైద్య విద్యార్థుల కోసం సమావేశ మందిరం, వాహనాల పార్కింగు ప్రాంతం తదితర సౌకర్యాలు ఉంటాయని ఆయన పేర్కొన్నారు. ఎమ్కేసీజీ రేడియాలజీ విభాగం ఆధీనంలోని క్యాన్సర్‌ కేంద్రానికి దక్షిణ ఒడిశా జిల్లాల నుంచి ప్రతిరోజు ఇరవై మంది వరకూ రోగులు వస్తుంటారు. బాధితులు రోజుల తరబడి చికిత్సలు పొందుతుంటారు. ఈ భవనం పాతది కావడంతో చిన్న వార్డులో రోగులకు ప్రస్తుతం చికిత్సలు అందిస్తున్నారు. మరోవైపు క్యాన్సర్‌ వైద్య నిపుణులు, ఆధునిక సౌకర్యాల కొరత వెంటాడుతోంది. కొత్తగా క్యాన్సర్‌ కేర్‌ సెంటర్‌ నిర్మాణంతో ఆయా సమస్యలన్నీ పరిష్కారమవుతాయన్న ఆశలు చిగురిస్తున్నాయి.