జగన్నాథుని సన్నిధిలో ధర్మేంద్ర పూజలు

అరుణ స్తంభం వద్ద ప్రార్థిస్తున్న కేంద్ర మంత్రి

గోపాలపూర్‌, న్యూస్‌టుడే: దసరా సెలవుల నేపథ్యంలో పూరీ శ్రీక్షేత్రం అసంఖ్యాక భక్తులతో కిటకిటలాడుతోంది. మంగళవారం వర్షాలు కురుస్తున్నా సందర్శకులు జగన్నాథ దర్శనానికి బారులు దీరారు. కేంద్ర విద్యాశాఖ మంత్రి ధర్మేంద్ర ప్రధాన్‌ ఉదయం పురుషోత్తమ సన్నిధికి చేరుకుని స్వామికి పూజలు చేశారు. మహాలక్ష్మి, విమల ఆలయాల్లో దీపారాధన చేసిన ఆయన అరుణ స్తంభం వద్ద పూజలు నిర్వహించారు. జగన్నాథుడు, విమలమ్మ దేశ ప్రజలకు శుభాలు కలిగించాలని ప్రార్థనలు చేసినట్లు ధర్మేంద్ర విలేకరులకు చెప్పారు. విజయదశమిని పురస్కరించుకుని మంగళవారం సందర్శకుల రద్దీ ఇంకా పెరిగే సూచనలు ఉన్నందున శ్రీక్షేత్రం లోపల, వెలుపల పోలీసు యంత్రాంగం గట్టి బందోబస్తు ఏర్పాటు చేసింది.