అసెంబ్లీని భాజపా రాజకీయ వేదిక చేసింది

సీఎల్పీ నేత నర్సింగ మిశ్ర ధ్వజం

నర్సింగ మిశ్ర

భువనేశ్వర్‌, న్యూస్‌టుడే: భాజపా నాయకులు శాసనసభను రాజకీయ వేదికగా చేసుకొని రాజకీయం చేస్తున్నారని కాంగ్రెస్‌ సభాపక్షం నేత నర్సింగ మిశ్ర ధ్వజమెత్తారు. శుక్రవారం ఆయన విలేకరులతో మాట్లాడుతూ.. శీతాకాలం అసెంబ్లీ సమావేశాల ప్రారంభం నుంచి ఆ పార్టీ సభ్యులు విలువలకు సమాధి కట్టారని, చీటికిమాటికి పోడియం వద్ద ఆందోళన చేస్తూ కార్యక్రమాలకు అంతరాయం కలిగిస్తున్నారని ఆవేదన  వ్యక్తం చేశారు. స్వీయ లబ్ధి, రాజకీయ ప్రయోజనాలే ధ్యేయంగా చేసుకున్న భాజపా పెద్దలు తాము విపక్షంలో ఉన్నామని, ప్రజల కోసం ఉద్యమిస్తున్నామని చెప్పుకోవడం సిగ్గుచేటన్నారు. శుక్రవారం ఆ పార్టీ నాయకులు సభ లోపల, వెలుపల వ్యవహరించిన తీరు గణతంత్రానికి గొడ్డలిపెట్టుగా మిశ్ర అభివర్ణించారు.