ఈ కపోతాలు... ఎంతో ప్రత్యేకం

గణతంత్ర వేడుకల్లో పావురాలతో పోలీసులు

కటక్‌, న్యూస్‌టుడే: రాష్ట్ర పోలీసు శాఖలో పావురాలకు ఎంతో ప్రాధాన్యం ఉంది. సాధారణంగా గణతంత్ర దినోత్సవం, స్వాతంత్య్ర దినోత్సవం, పోలీసు వ్యవస్థాపక దినోత్సవాల్లో ఇవి కనిపిస్తాయి. కార్యక్రమం ప్రారంభమైన వెంటనే వీటిని ఎగరేస్తారు. ఇలా పైకి ఎగిరిన ఈ పావురాలు తిరిగి కటక్‌లో ఉన్న పోలీస్‌ ప్రిజన్‌కు తమకు తాముగా చేరుకుంటాయి. ఈ పావురాల విభాగంలో బాధ్యతలు నిర్వహిస్తున్న పోలీస్‌ అధికారి అందించిన వివరాల ప్రకారం... ప్రస్తుతం కటక్‌ పోలీస్‌ ప్రధాన కార్యాలయంలో పావురాలకు శిక్షణ ఇవ్వడంతోపాటు వాటికి ఉంచేందుకు సౌకర్యాలు కల్పిస్తున్నారు. ఇక్కడ 100కు పైగా కపోతాలు ఉన్నాయి. వీటి కోసం ఏటా ప్రత్యేక బడ్జెట్‌ రూ.3 లక్షలు కేటాయిస్తారు. వీటి శిక్షణ, సంరక్షణ కోసం 25 మంది సిబ్బంది పనిచేస్తున్నారు. ఒక పావురం 15 ఏళ్ల వరకు బతుకుతుంది. రోజుకు రెండుసార్లు వీటికి ప్రత్యేక ఆహారం పెడతారు. రవాణా సౌకర్యాలు సరిగా లేని ప్రాంతాల్లో విధుల్లో ఉన్న పోలీసులకు సమాచారం అందించేందుకు కూడా వీటిని వినియోగిస్తున్నారు. ఈ విభాగం రాష్ట్రానికి ప్రత్యేకమని ఆ అధికారి తెలిపారు.