ఆదిత్యాయ నమోనమః

గోపాల్‌పూర్‌లో రథసప్తమి వేడుకలు

భానునికి సామూహిక ప్రార్ధనలు

గోపాల్‌పూర్‌, న్యూస్‌టుడే: భాస్కరాయ నమోనమః అన్న ప్రార్ధనలతో శనివారం ఉషోదయపు వేళ గోపాల్‌పూర్‌ సాగర తీరం అలరారింది. మాఘ శుక్ల(రథ) సప్తమి పర్వదినాన్ని పురస్కరించుకుని వేలాదిగా భక్తులు పవిత్ర స్నానాలు చేసి ప్రత్యక్ష దైవం సూర్యనారాయణ మూర్తికి పూజలు చేశారు. దూర ప్రాంతాల నుంచి వచ్చిన మహిళలు తీరం వద్ద ఇసుక తిన్నెల్లో మట్టి కుండల్లో స్వామికి ప్రీతికరమైన పొంగళి వండి అర్ఘ్యమిచ్చి తర్వాత అర్పణ చేశారు. కొంతమంది పితృదేవతల (దివంగతలు)కు పిండ ప్రదానాలు, అస్థికల నిమజ్జనం చేశారు. ప్రత్యేక బస్సుల్లో తెల్లవారుజాము నుంచే యాత్రికులు చేరుకోగా, బీచ్‌ రోడ్‌ కిటకిటలాడింది. పోలీసు యంత్రాంగం, అగ్నిమాపక జవానులు, లైఫ్‌ గార్డులు తీరం వద్ద భద్రతా చర్యలు చేపట్టారు.