రోడ్డు ప్రమాదంలో నలుగురి మృతి

ప్రమాదానికి గురైన ఆటోలో మృతదేహాలు

కటక్‌, న్యూస్‌టుడే. కేంఝర్‌ జిల్లా పండపడ పోలీస్‌ స్టేషన్‌ పరిధిలోని ఊచబెడ గ్రామం వద్ద శనివారం ఉదయం జరిగిన రోడ్డు ప్రమాదంలో నలుగురు మృతి చెందారు. మరో అయిదుగురు తీవ్రంగా గాయపడ్డారు. స్థానిక పోలీసులు అందించిన వివరాల ప్రకారం... కమండర గ్రామానికి చెందిన కొంతమంది రైతులు, వ్యాపారులు కేంఝర్‌ పట్టణానికి వెళ్లి వారు తీసుకెళ్లిన సామగ్రి విక్రయించి తిరిగి గ్రామానికి ఆటోలో బయలుదేరారు. ఊచబెడ గ్రామం వద్ద ఆటో, ఎదురుగా వస్తున్న వ్యాను ఢీకొన్నాయి. దీంతో ఘటనా స్థలంలో ఆటోలో ఉన్న ముగ్గురు మృతిచెందగా మరొకరు ఆసుపత్రిలో చికిత్స పొందుతూ మృతిచెందారు. మృతి చెందిన వారు జీవన్‌ నాయక్‌ (25), రాధా నాయక్‌ (60) నవీన్‌ నాయక్‌ (48), ప్రహ్లాద నాయక్‌(45). గాయపడిన అయిదుగురిని జిల్లా ప్రధాన ఆరోగ్య కేంద్రానికి తరలించారు. ప్రమాదం అనంతరం ఆ ప్రాంతంలో ఉద్రిక్తత నెలకొంది. రహదారిపై స్థానికులు రాస్తారోకో నిర్వహించారు. పోలీసులు ఘటనా స్థలానికి చేరుకొని మృతుల కుటుంబాలకు పరిహారం అందిస్తామని హామీ ఇవ్వడంతో పరిస్థితి సద్దుమణిగింది.