గిన్నిస్‌ బుక్‌లో బిర్సాముండా స్టేడియానికి స్థానం

క్రీడా మైదానం

భువనేశ్వర్‌, న్యూస్‌టుడే: సుందర్‌గఢ్‌ జిల్లా రవుర్కెలాలోని బిర్సాముండ హాకీ స్టేడియం ప్రపంచంలోనే పెద్దదిగా గిన్నిస్‌బుక్‌ అఫ్‌ రికార్డ్‌లో స్థానం సంపాదించింది. 5-టీ కార్యదర్శి వి.కార్తికేయపాండ్యన్‌ ఈ విషయాన్ని ఆదివారం స్వయంగా ముఖ్యమంత్రి నవీన్‌ పట్నాయక్‌కు తెలియజేయడంతో ఆయన ఆనందం వ్యక్తం చేశారు. రాష్ట్ర ప్రభుత్వం రెండోసారి ప్రపంచకప్‌ హాకీ (పురుషులు) పోటీలకు స్పాన్సరర్‌గా వ్యవహరిస్తోంది. ఇటీవల పోటీల ప్రారంభానికి ముందు ఈ క్రీడామైదాన ఆధునికీకరణ పనులు ప్రారంభించింది. ఈ పనులకు సుమారు రు.1200 కోట్లు వెచ్చించారు. 15 నెలల్లో పనులు పూర్తి చేశారు. 21,800 మంది కూర్చొని తిలకించే వెసులుబాటుంది. అత్యాధునిక సౌకర్యాలున్నాయి. దీన్ని గతనెల (జనవరి)లో శుభారంభం చేసిన నవీన్‌ ఈ స్టేడియం రాష్ట్ర గౌరవంగా పేర్కొన్నారు. ఈ క్రమంలో ఈ మైదానం గిన్నిస్‌ బుక్‌లో చోటు దక్కించుకుంది.